Braziliya noyabrın 10-21-də Para ştatının Belen şəhərində keçiriləcək Birləşmiş Millətlər Təşkilatının İqlim Dəyişmələri üzrə 30-cu Konfransında (COP30) iştirak edən ölkələrin vətəndaşlarına artıq elektron viza (e-Visa) verəcək.

AZƏRTAC COP30 Təşkilat Komitəsinin məlumatlarına istinadla xəbər verir ki, e-Visa sistemi bu mühüm beynəlxalq iqlim tədbirinin bütün iştirakçıları üçün daha çox rahatlıq və təhlükəsiz şərait təklif etməklə, giriş prosesini sadələşdirmək məqsədi daşıyır. Yeni elektron viza ödənişsiz əsasla təqdim ediləcək. O, il ərzində Braziliyaya çoxdəfəlik giriş hüququ və uzadılma imkanı olmadan 90 günə qədər ölkədə qalma imkanı verəcək.

Əvvəllər Braziliyaya daxil olmaq üçün viza tələb edən ölkələrin vətəndaşları indi öz ölkələrindəki Braziliya konsulluğuna baş çəkmək ehtiyacından canını qurtararaq, elektron şəkildə ərizə verə bilərlər. İndiyədək bu imkan yalnız ABŞ, Kanada və Avstraliya vətəndaşları üçün əlçatan olub.

Tədbirdə Birləşmiş Millətlər Təşkilatının İqlim Dəyişmələri üzrə Çərçivə Konvensiyasını (UNFCCC) imzalamış 198 ölkədən nümayəndələrin iştirak gözlənilir. İki həftə ərzində danışıqların iştirakçıları Amazonun tam ürəyində qlobal istiləşməyə səbəb olan istixana qazları emissiyalarının azaldılmasına dair qlobal hədəflər üzrə konsensusa nail olmağa çalışacaqlar.

“COP30 üçün elektron viza platformasının tətbiqi Xarici İşlər Nazirliyinin rəqəmsal transformasiyası prosesində mühüm mərhələni ifadə edir. Bu, bütün dünya üzrə müraciət edənlər üçün çıxışı asanlaşdırır və viza ərizə ilə müraciət etmə prosesini sürətləndirir. Bu tədbir konfransın məqsədlərinə uyğun olaraq nazirliyin konsulluq xidmətlərinin modernləşdirilməsinə və rəqəmsal və davamlı təcrübələrin təşviqinə sadiqliyini təsdiqləyir”, - deyə səfir və nazirliyin Braziliya İcmaları, Konsulluq və Hüquq Məsələləri üzrə katibi Marsiya Loureyru qeyd edib.

Elektron viza platformasının tərtib edilməsi həm də Braziliya innovasiyalarını nümayiş etdirir, üstəlik burada Federal Məlumat Emalı Xidməti (SERPRO) əsas rol oynayır. “Bu təşəbbüs viza verilməsini sürətləndirir və belə miqyaslı beynəlxalq tədbir üçün olduqca vacib olan inklüzivliyi və əlçatanlığı təşviq edir”, - deyə SERPRO-nun biznes, dövlət orqanları və bazarlarla iş üzrə direktoru Andre Aqatt əlavə edib.