Şimal-Qərb Tibb Universitetinin alimləri müəyyən ediblər ki, immun hüceyrələrinin xüsusi bir növü olan 1-ci tip şərti dendritik hüceyrələr (cDC1) orqan transplantasiyasının uğurla qəbul edilməsində mühüm rol oynayır.

AZƏRTAC “MedicalXpress” portalına istinadla xəbər verir ki, araşdırma “The Journal of Clinical Investigation” jurnalında dərc olunub.

Ürək transplantasiyası ürək çatışmazlığının son mərhələsində olan xəstələr üçün həyati əhəmiyyət daşıyır. Bir illik sağqalma nisbətləri yaxşılaşsa da uzunmüddətli nəticələrdə irəliləyiş hələ azdır.

Tədqiqatçılar siçanlar üzərində apardıqları təcrübələrdə aşkar ediblər ki, cDC1 hüceyrələrinin çatışmazlığı olan heyvanlar, transplant olunmuş ürəyi daha tez rədd edir. Bunun əsas səbəblərindən biri tənzimləyici T-hüceyrələrin (Treg) azalmasıdır. Bu hüceyrələr normalda immun sisteminin həddindən artıq aktivləşməsinin qarşısını alır.

Araşdırma zamanı cDC1 hüceyrələrinin səthində “TGF beta 1” adlı zülalın artdığı müşahidə olunub. Bu zülal Treg hüceyrələrinin formalaşmasına kömək edir. “TGF beta 1”dən məhrum edilən cDC1 hüceyrələri olan siçanlarda da orqan rəddi daha tez baş verib. Alimlər ümid edirlər ki, gələcəkdə bu hüceyrələri xüsusi şəkildə hədəf alan dərmanlar və ya nanohissəciklər hazırlanaraq orqan transplantasiyasından sonra uzunmüddətli sağqalma nisbətləri yüksəldilə bilər. Bu tapıntılar bərk orqan nəqlində yeni, daha təhlükəsiz və təsirli müalicə strategiyalarına yol aça bilər.