ABŞ-ın atdığı addımlarla "Pandoranın qutusunu" açıb və bunun hansı nəticələrə gətirib çıxaracağı hələ dəqiq bilinmir.

Turaztv.az APA-ya istinadən xəbər verir ki, bunu Rusiyanın BMT-dəki daimi nümayəndəsi Vasili Nebenzya Təhlükəsizlik Şurasının iclasında bildirib.

Onun sözlərinə görə, AEBA-nın baş direktoru Rafael Qrossi ABŞ-ın hücumlarının yalnız İrana deyil, bütün regiona təhlükə yarada biləcəyi barədə xəbərdarlıq etmişdi:

“Lakin Vaşinqtonu nə radiasiya riski, nə də çoxsaylı mülki şəxslərin həyatı və sağlamlığı maraqlandırır”.

Rusiyalı diplomat bildirib ki, ABŞ dünyada öz hegemonluğunu qorumaq naminə beynəlxalq hüququn istənilən normalarını pozmağa hazırdır.

“Rusiya ABŞ-ın bu məsuliyyətsiz, təhlükəli və təhrikedici hərəkətlərini qətiyyətlə pisləyir,” – deyə diplomat əlavə edib.


Nebenzya onu da qeyd edib ki, Rusiya münaqişənin nizamlanması üçün vasitəçilik xidmətlərini dəfələrlə təklif edib.

“ABŞ beynəlxalq ictimaiyyətin ümumi mövqeyini görməzlikdən gələrək İsrailin iradəsinə boyun əydi və onu durdurmaq əvəzinə eskalasiyanı daha da alovlandırmasına şərait yaratdı,” – deyə Rusiyanın BMT-dəki daimi nümayəndəsi bəyan edib.