Vaxtilə işğal altında olan ərazilərimizdə qondarma rejimin nümayəndələrinin davranışları Azərbaycan cəmiyyətində çox ciddi narahatlıq yaradırdı. Kiminin Cıdır düzündə rəqsi, kimisinin özünü qəhrəman kimi təqdim edib müsahibə verməsi və ya dırnaqarası parad, görüşlər keçirməsi bizi qıcıq edirdi desək, yanılmarıq.

Amma 44 günlük Vətən müharibəsi bütün ssenariləri alt-üst etdi. Məhz bu şanlı Zəfər bizi doğma yurdumuza qovuşdurmaqla yanaşı, davamında ərazi bütövlüyümüzü də təmin etdi.

Beynəlxalq təşkilatların, BMT-nin, Qərbin, eləcə də faydasız Minsk qrupunun təmin edə bilmədiyi ilahi ədalətə özümüz öz gücümüzlə nail olduq. Və vaxtilə Azərbaycan torpaqlarında at oynatdığını düşünənlər, indi ilahi ədalət məhkəməsində - Bakıda hakim qarşısında cavab verirlər.

Bu gün Bakı Hərbi Məhkəməsində Azərbaycana qarşı çoxsaylı hərbi cinayətlərdə ittiham olunan qondarma rejimin nümayəndələrinin prosesində bir foto xüsusilə diqqətimizi çəkdi. Söhbət qondarma rejimdə general-leytenant rütbəsi ilə “müdafiə naziri” olmuş Levon Mnatsakanyanın şəklindən gedir.

Belə ki, bugünkü məhkəmədə L.Mnatsakanyanın verdiyi daha bir müsahibə nümayiş etdirilib. Videogörüntülərdə o, Cıdır düzündə jurnalistin suallarını cavablandırır. Özü də ayağını ayağının üzərinə aşıraraq...

Qısa arayış olaraq bildirək ki, o, müsahibədə Aprel döyüşlərindən bəhs edir, “Yaşma”nın gücünü ciddiyə almır və s.

Davamını isə bütün dünya bilir...

İndi Mnatsakanyan o müsahibəyə müttəhhim kimi baxır. Özü də boynunu bükərək...

Emin Səfərov