Pakistan və Hindistan silahlı qüvvələri döyüş hazırlığı səviyyəsini azaltmaq məqsədilə etimadın möhkəmləndirilməsi tədbirlərini davam etdirməyi qərara alıblar.

"Turaztv.az" “Report”-a istinadən xəbər verir ki, bu barədə Hindistan ordusundakı mənbə bildirib.

“Hindistan və Pakistan hərbi əməliyyat komandanlarının mayın 10-da əldə etdikləri qarşılıqlı anlaşmaya əlavə olaraq, döyüş hazırlığı səviyyəsini azaltmaq məqsədilə etimadın möhkəmləndirilməsi tədbirlərini davam etdirmək qərara alınıb”, – o açıqlayıb.

Daha əvvəl Pakistanın Baş nazirinin birinci müavini, xarici işlər naziri İshaq Dar demişdi ki, Hindistan və Pakistan atəşkəs rejimini mayın 18-dək uzatmaq barədə razılığa gəliblər. Dar bu barədə razılaşmanın iki ölkənin hərbi əməliyyat komandanlarının mayın 14-də telefon danışığı zamanı əldə edildiyini qeyd etmişdi.

Xatırladaq ki, 7 may gecəsi Hindistan Müdafiə Nazirliyi Pahalqamdakı terror aktına cavab olaraq, Pakistan ərazisində “terror infrastrukturuna” zərbə endirərək “Sindur” əməliyyatını həyata keçirdiyini elan etmişdi. İslam Respublikasının iqtidarı isə öz növbəsində bildirmişdi ki, Hindistan Pakistanda beş yaşayış məntəqəsinə hücum edib və nəticədə onlarla insan ölüb. Pakistan XİN vurğulamışdı ki, ölkə rəhbərliyi adekvat cavab vermək hüququnu özündə saxlayır.

Əməliyyatın başlanmasından dörd gün sonra Hindistan və Pakistan mayın 10-dan etibarən quruda, havada və dənizdə bütün atəşləri və hərbi əməliyyatları dayandırmaq barədə razılığa gəliblər. Hindistan ordusunun sonradan bildirdiyi kimi, iki ölkənin yüksək rütbəli hərbçiləri arasında aparılan danışıqların nəticəsində qoşunların sərhədlərdən və ön xətt bölgələrindən dərhal çıxarılmasını təmin etmək üçün tədbirlərin nəzərdən keçirilməsi qərara alınıb.