Rusiyalı alimlər 15-20 dəqiqə ərzində süd vəzi xərçəngini erkən mərhələdə aşkar etməyə imkan verən ultrahəssas biosensorlar hazırlayıblar. Bu barədə cihazın müəlliflərindən biri, Skolkov Elm və Texnologiyalar Universitetinin aspirantı Aleksey Kuzin “İzvestiya” qəzetinə bildirib.

AZƏRTAC həmin qəzetə istinadla xəbər verir ki, Kuzinin sözlərinə görə, təhlilin aparılması üçün xəstənin qanının bir damcısı kifayətdir. O izah edib ki, cihazda orqanizmin hüceyrələri arasında maddələrin nəqlində iştirak edən molekullar – vezikullar olan mikroçiplərdən istifadə olunur. Onların köməyi ilə xəstəliyin olub-olmaması haqqında məlumat əldə etmək mümkündür.

Alim qeyd edib ki, vezikulları tutan molekullardan istifadə olunması anticisimlərdən istifadədən daha ucuz başa gəlir. Bununla belə, çiplərin özləri sadə quruluşa malikdir, buna görə də mütəxəssislər onları kütləvi şəkildə istehsal edə biləcəklər. Bundan əlavə, cihaz, o cümlədən eyni zamanda bir neçə patologiyanın diaqnostikası üçün təkrar istifadə edilə bilər.