Görkəmli qırğız yazıçısı Çingiz Aytimatovun "Ana tarla" əsəri əsasında hazırlanmış tamaşanı 9-cu Beynəlxalq Kitab Sərgisinin ziyarətçilərinə təqdim etdik. Tamaşanın mövzusu Azərbaycan xalqı üçün də aktualdır. Belə ki, müharibədə övladını itirmiş valideynlər, Qarabağ müharibəsində savaşan igidlərimiz sözügedən tamaşada öz hisslərinə toxunan məqamlar tapa bilər.

Bu sözləri 9-cu Beynəlxalq Kitab Sərgisinin ziyarətçisi, Beynəlxalq Türk Mədəniyyəti və İrsi Fondunun prezidenti Günay Əfəndiyeva AZƏRTAC-a müsahibəsində bildirib.

Türk dünyasının mədəni irsini təbliğ etməyin vacibliyinə toxunan Günay Əfəndiyeva deyib: "Biz ədəbiyyatımızı nə qədər çox təbliğ etsək, mədəniyyətimizi dünyaya nə qədər düzgün nümayiş etdirsək, türk xalqları olaraq bir-birimizə o qədər yaxın olacağıq. Biz ötən illər ərzində bir çox layihələr həyata keçiririk. Bunlardan biri də Türk dünyası yazıçılarının əsərlərinin yayımlanmasıdır”.