2022-2026-cı illərdə dövlət qulluqçuları üçün korrupsiyaya qarşı mübarizə və etik davranış qaydaları ilə bağlı təlim kursları təşkil ediləcək.

Turaztv.az AZƏRTAC-a istinadən xəbər verir ki, “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”nın tədbirlər planına əsasən, təlim kursları Dövlət İmtahan Mərkəzi tərəfindən təşkil olunacaq. Korrupsiyaya qarşı mübarizə üzrə Komissiya bu təlimlərin təşkilində digər icraçı olaraq tövsiyə edilir.

Milli Fəaliyyət Planının tədbirlər planına əsasən, dövlət qulluqçuları üçün korrupsiyaya qarşı mübarizə və etik davranış qaydaları ilə bağlı təlimlərin keçirilməsi məqsədilə iş planı təsdiq ediləcək. Dövlət qulluqçuları sözügedən təlimlərə mərhələli şəkildə cəlb ediləcək. Yekun nəticə olaraq dövlət qulluqçularının korrupsiyaya qarşı mübarizə və etik davranış qaydaları ilə bağlı məlumatlılığı artacaq.

Xatırladaq ki, “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” Azərbaycan Respublikası Prezidentinin 2022-ci il 4 aprel tarixli Sərəncamı ilə təsdiq edilib. Milli Fəaliyyət Planı fərqli fəaliyyət istiqamətləri olan müxtəlif qurumların korrupsiyaya qarşı mübarizə səylərini birləşdirməyə xidmət edir, eləcə də korrupsiyaya qarşı mübarizənin bütün dövlət strukturları və vətəndaş cəmiyyəti institutları ilə birgə sistemli və əlaqəli şəkildə gerçəkləşdirilməsinə imkan yaradır.

Azərbaycanın korrupsiyaya qarşı mübarizə təcrübəsi sistemli, kompleks və innovativ xarakteri ilə seçilir. Bu sahədə görülən tədbirlər çərçivəsində korrupsiyaya qarşı mübarizəyə dair milli strategiya və fəaliyyət planları qəbul edilib, yeni baxışlar və vəzifələr müəyyən edilib. Hazırda ölkəmizdə sosial dövlətin yeni modeli formalaşıb və dövlət siyasətinin əsas məqsədi insanların yüksək sosial rifahına nail olmaqdır.