“Bu gün saat 5-də amnistiya məsələsini Milli Məclisdə müzakirə edəcəyik. Bundan sonra amnistiyanın təxmini dairəsini biləcəyik. Hələ ki, əlimizdə dəqiq arayış yoxdur. Ona görə də amnistiyaya düşəcək insanların dəqiq sayı haqqında fikir söyləmək çətindir. Amma kifayət qədər geniş amnistiyadır. Burada daha əvvəl olmayan maddələr var”.

Bunu Publika.az–a açıqlamasında Milli Məclisin deputatı, Hüquq siyasəti və dövlət quruculuğu komitəsinin üzvü Tahir Kərimli deyib.

Deputat bildirib ki, budəfəki amnistiya İkinci Qarabağ müharibəsindən sonra öz dədə-baba yurdlarından qaçqın düşmüş, eləcə də Qarabağdan məcburi köçkün düşmüş şəxslərə də şamil olunacaq:

“Eləcə də müharibə iştirakçılarına, əlillərə də tətbiq oluna biləcək bir amnistiyadan söhbət gedir. Şəhid ailələri, onların yaxın qohumlarına da bu amnistiyadan pay düşəcək. Düşünürəm ki, çox geniş bir amnistiya olacaq. Təxminən maddələr də məlumdur. Müharibədə iştirak edən bütün şəxslərə, eləcə də onların yaxın qohumlarına şamil ediləcək. Xocalı soyqırımının şahidləri, orada əlil olan şəxslərə də bu amnistiyadan pay düşəcək. 20 Yanvarda əlil olan şəxslərə, onların yaxın qohumlarına şamil ediləcək. İkinci Dünya müharibəsində itkin düşənlərin ailə üzvləri, eləcə də 16 yaşından yuxarı uşaqlara da şamil olunacaq. Ağır və xüsusi ağır olmayan cinayət törədənlərin hamısına bu amnistiyadan bu və ya digər dərəcədə pay düşəcək. Şərti azadlıqdan məhrum edilənləri də götürsək, təxminən 10 minə yaxın şəxs amnistiyadan yararlanacaq. Bu mənim fikrimdir. Təhlil edərkən bu qənatə gəlirəm ki, ümumən təxminən bu qədər adama amnistiyadan pay düşəcək”.