(esse)



...Darıxmaq insan ruhunun ən səssiz ən dərin hislərindən biridir bəlkə də.Onu nə tam anlamaq olur, nə də gizlətmək. Çünki darıxmaq sadəcə bir insanı, bir zamanı, bir xatirəni yada salmaq deyil. Darıxmaq - ruhun özündən bir parçanı itirməsi kimidir. Elə buna görə də bu hiss gələndə insanın baxışları dəyişir, səsi ağırlaşır, zaman isə sanki yerində donub qalır...
Bəzən göy üzünü saran qara buludlar kimi çökür insanın içinə bu duyğu. Göz yaşları sakitcə yanaqlardan süzülərkən sanki göylə ürək arasında görünməz bir əlaqə yaranır-söhbət başlayır. Ətrafdakı insanlar bunu hiss etməsələr də darıxan insanın baxışlarında qəribə bir yorğunluq olur. Elə bil ruh dumana bürünür, getdiyi yollar belə ona fərqli görünür. Hər şey yerində olsa da heç nə əvvəlki kimi təsir bağışlamır.
O anlarda belə saatın əqrəblərindən sanki daş sallanıb.Zaman keçmir...təbiətdəki bütün rəngər qarışır... Gözdən asılmış bir xəyal, qulaqda səslənən bir səs insanın daxilində yenidən canlanır. Xatirələr unudulmur... insanın qəlbində yaşayır.

Darıxanda gecələrin də ayrı bir dili olur. Səssizlik danışır sanki... Soyuq bir meh toxunur üzünə, bir anlıq kiminsə nəfəsini hiss edirsən yaxında...
Bəlkə də bu xatirələrin oyunudur, amma adam buna inanmaq istəyir. Bir zamanlar yaşanmış şirin anlar geri dönür...Gözlərini yumduqda bir cüt baxış yenidən canlanır gözünün önündə.
Darıxmaq -yalnız kədər deyil,o həm də sevginin dəyişmiş formasıdır. Adam yalnız qəlbində dərin iz buraxanlar üçün darıxır. Əgər birinin yoxluğu canını incidirsə, deməli o adam ruhunda, qəlbində dərin bir yerə sahib olub. Bəzən bunu etiraf etmək çətin olsa da, darıxmaq sevgidən qalan ən saf, ən dərin, ən ilahi hisslərdən biridir.
Və bəlkə də gözlərdən süzülən o,, billur yağış" kədəri yox etmək üçün gəlir. Çünki insan ağladıqca içində yığılan o nisgil bir az azalır. Yağış torpağı necə təmizləyirsə göz yaşları da ruhu eləcə təmizləyir. Lakin elə hisslər var ki, heç vaxt silinmir. Onlar sadəcə olaraq ürəyin ən dərin qatlarında özünə yer tapır və zaman -zaman üzə çıxaraq darıxdırır onu...