İranın “Tasnim” xəbər agentliyi Hörmüz boğazının yenidən gəmiçiliyə açılması üçün rəsmi Tehranın irəli sürdüyü sərt şərtləri açıqlayıb.

“Qafqazinfo” xəbər verir ki, agentliyin məqaləsində boğazın açılmasının sadəcə hərbi əməliyyatların dayandırılması ilə mümkün olmayacağı vurğulanıb.

Qeyd olunub ki, bu proses strateji güzəştlərlə əlaqələndirilməlidir. Tehranın şərtlərinə İrana qarşı sanksiyaların zəmanətli ləğvi, dondurulmuş aktivlərin qaytarılması, ABŞ bazalarının bölgədən çıxarılması və dolların ticarətdən kənarlaşdırılması daxildir. İran tərəfi hesab edir ki, regional ölkələr iqtisadi və təhlükəsizlik əməkdaşlığı vasitəsilə ABŞ-nın təzyiqlərini tamamilə neytrallaşdırmalı və Yaxın Şərqdə yeni bir nizam yaratmalıdırlar.

Xatırladaq ki, martın 12-də ABŞ-nin maliyyə naziri Skott Bessent gəmilərin müşayiəti üçün beynəlxalq koalisiya yaratmağı təklif etsə də, Aİ-nin xarici siyasət rəhbəri Kaya Kallas Avropa dövlətlərinin bu missiyaya gəmi göndərməyə hazır olmadığını bəyan edib.