Lüks brendlər nəhəngi LVMH-in (“Louis Vuitton Moët Hennessy”) rəhbəri Bernard Arnaultun sərvəti bir gecədə 19 milyard dollar artıb. Artım şirkətin güclü maliyyə nəticələrinin açıqlanmasından sonra baş verib.

“Qafqazinfo” “Fortune” jurnalına istinadən xəbər verir ki, Arnaultun sərvəti 14-15 oktyabr tarixləri arasında 173 milyard dollardan 192 milyard dollara yüksəlib.

Bu artımla o, “Bloomberg Milyarderlər İndeksi”ndə səkkizinci yerdən yeddinci yerə yüksələrək, 176 milyard dollar sərvəti olan keçmiş “Microsoft” CEO-su Stiv Ballmeri geridə qoyub.

Arnaultun sərvəti il ərzində qlobal lüks bazarındakı eniş-yoxuşlara paralel olaraq dəyişikliklər göstərib. “Bloomberg”in məlumatına görə, sərvəti yanvarda 209 milyard dollara qədər yüksəlsə də, apreldə 148 milyard dollara, iyun ayında isə 146 milyard dollara qədər azalıb.


Bu dəyişikliklər, əsasən, istehlakçıların bahalı məhsullardan daha çox səyahət və təcrübəyə yönəlməsi ilə izah olunur.

Arnaultun 48% paya sahib olduğu LVMH ilin əvvəlində də güclü performans nümayiş etdirib. Şirkət ötən il 98,8 milyard dollar gəlir və 22,9 milyard dollar xalis mənfəət əldə edib. Bu rəqəmlər Asiya, ABŞ və Avropada qeyri-sabit iqtisadi şəraitə baxmayaraq əldə olunub.

Bununla belə, ilin ilk yarısında əsas bazarlarda tələbin zəifləməsi və gömrük tarifləri ilə bağlı qeyri-müəyyənlik lüks sektoruna mənfi təsir göstərib.

LVMH-nin üçüncü rübdə gəlirini 1% artıraraq 21,2 milyard dollara çatdırması maliyyə ilinin əvvəlindən bəri ilk artım kimi qeydə alınıb. Şirkətin səhmləri açıqlamadan sonra 12% dəyər qazanıb və bu, LVMH-nin 38 illik tarixində ikinci ən böyük gündəlik artım olub.

Analitiklər xəbərdarlıq edirlər ki, Arnaultun sərvətinin əvvəlki rekord səviyyəyə çatması asan olmayacaq. “McKinsey” şirkətinin araşdırmasına görə, qlobal lüks sektoru 2024-2027-ci illər ərzində illik 1-3% arasında yavaşlama ilə üzləşə bilər.