Sofiyanın Vasil Levski hava limanında diplomatik qalmaqal yaranıb.

"Turaztv.az" "Unikal" -a istinadən xəbər verir ki, Ermənistanın Ani şəhərinin meri Arman Sarıbekyanın rəhbərlik etdiyi nümayəndə heyəti alçaldıcı təhlükəsizlik yoxlamasına məruz qalıb: məlumatlara görə, qonaqlar lüt soyunmağa məcbur edilib, sorğu-sual edilib və bir neçə saat inzibati binalarda saxlanılıb.


Hadisə oktyabrın 1-də baş verib. Ermənistan nümayəndə heyəti Bolqarıstana Novi Pazar meri Georgi Georgiyevin dəvəti ilə gediblər. Georgiyevin sözlərinə görə, rəsmi şəxslər və onu müşayiət edən heyət bütün lazımi sənədlərə, Bolqarıstanın İrəvandakı səfirliyi tərəfindən verilmiş Şengen vizalarına malik olub. Buna baxmayaraq, onlar gecə saat 2:20 radələrində gələrkən sərhəd polisi tərəfindən saxlanılıblar.

"Qonaqlarımızı ayrıca otağa aparıblar, orada lüt soyunmağa məcbur ediliblər və hərtərəfli axtarış aparılıb. Şəxsi əşyalar açılıb, hətta hədiyyə olaraq gətirdikləri rəsmin çərçivəsi də zədələnib. Bütün bunlar onların kim olduqları, nə üçün gəldikləri barədə təhqiredici suallarla müşayiət olundu”, - Georgiyev bildirib.

Onun sözlərinə görə, polis nümayəndə heyətinin sərhədi qanunsuz keçməyə cəhd etməkdə və Avstriyaya getmək niyyətində olduğundan şübhələndiklərini bildirib. Söhbət yalnız bolqar və ingilis dillərində aparılıb; rus dilində ünsiyyət qurmaq cəhdlərinə məhəl qoyulmayıb.

Nümayəndə heyəti cəmi iki saat yarım sonra buraxılıb, lakin onlara oktyabrın 4-də hava limanına qayıtmaq və Bolqarıstanı tərk etmək əmri verilib. Əks halda ölkəyə giriş qadağası ilə üzləşəcəkləri deyilib.

Ermənistanın Sofiyadakı səfiri Tsovinar Hambardzumyan Bolqarıstanın xarici işlər naziri Georgi Georgiyevə rəsmi etiraz notası göndərərək, “dost ölkənin rəsmi nümayəndə heyətinə qarşı qəbuledilməz və alçaldıcı rəftardan” qəzəbləndiyini bildirib.

Hadisəyə baxmayaraq, Ermənistandan gələn qonaqlar hələ də Novi Pazarda keçirilən bayram tədbirlərində iştirak edə biliblər.