Bu ilin iyulunda Almaniyanın ixracatı iyunla müqayisədə 0,6 faiz, idxal isə 0,1 faiz azalıb. İyulda Almaniyadan 130,2 milyard avro dəyərində mal ixrac edilib, ölkəyə 115,4 milyard avro dəyərində məhsul idxal olunub. Ötən ilin müvafiq ayı ilə müqayisədə ixrac 1,4 faiz, idxal isə 4,3 faiz artıb.

AZƏRTAC xəbər verir ki, bu barədə Federal Statistika İdarəsinin məlumatında bildirilib.

Ölkənin xarici ticarət saldosu iyulda 14,7 milyard avro təşkil edib. Bu rəqəm iyunda 15,4 milyard avro, ötən ilin iyulunda isə 17,7 milyard avro olub.

Avropa İttifaqı (Aİ) ölkələrinə 74,8 milyard avroluq ixrac, 60,3 milyard avro dəyərində idxal həyata keçirilib. Bu, iyunla müqayisədə müvafiq olaraq 2,5 faiz və 1,1 faiz çoxdur. Avrozonaya isə ixrac 52 milyard avro (+2,5 faiz), idxal 39,8 milyard avro (+1,3 faiz) təşkil edib.

Aİ xaricindəki ölkələrə ixrac 55,3 milyard avro, idxal 55,1 milyard avro olub. Almaniyadan ən çox ixracat ABŞ-a həyata keçirilib. Bu rəqəm iyunla müqayisədə 7,9 faiz azalaraq 11,1 milyard avro təşkil edib. Bu, ardıcıl dördüncü aylıq azalma olmaqla yanaşı, 2021-ci ilin dekabrından sonra ən aşağı göstəricidir. Çinə ixrac iyunla müqayisədə 7,3 faiz azalaraq 6,4 milyard avro, Birləşmiş Krallığa isə 3,1 faiz azalaraq 7 milyard avro olub.

İyulda Almaniyaya ən çox Çindən - 14,3 milyard avro dəyərində mal gətirilib. Bu, əvvəlki aya nisbətən 2,4 faiz azdır. ABŞ-dan idxal 10 azalaraq 7,8 milyard avroya düşüb, Birləşmiş Krallıqdan idxal isə 7,8 faiz artaraq 3,2 milyard avroya çatıb.