Dırnaqların rəngi və toxumasındakı dəyişikliklər bəzən orqanizmdə gizli gedən sağlamlıq problemlərinin erkən əlaməti ola bilər.

AZƏRTAC Böyük Britaniyanın “The İndependent” nəşrinə istinadla xəbər verir ki, tibb üzrə mütəxəssis Miriam Mikickinin sözlərinə görə, davamlı rəng və forma dəyişikliklərinin qida çatışmazlığı, qan dövranı pozğunluğu və ya xroniki xəstəliklər barədə xəbərdarlıq siqnalı olması mümkündür.

Solğun və ya ağ görünən dırnaqlar anemiyaya, qaraciyər xəstəliyinə, dəmir və ürək çatışmazlığına işarə edə bilər. Bu vəziyyət yorğunluq, başgicəllənmə və nəfəs darlığı ilə müşayiət edilərsə, həkim müayinəsi tövsiyə olunur.

Ağ dırnaqların kənarlarının qaralması (“Terri dırnaqları”) qaraciyər xəstəliyi, diabet, böyrək və ürək çatışmazlığı ilə əlaqəli ola bilər. Yorğunluq və şişkinlik kimi əlamətlər olduqda, qan analizləri tələb edilir.

Dırnaqların saralması ən çox göbələk infeksiyaları nəticəsində baş verir. Lakin uzunmüddətli saralma xroniki tənəffüs xəstəlikləri, limfödem və diabetin göstəricisi ola bilər.

Mavi və ya bənövşəyi rəngdə dırnaqlar (“sianoz”) oksigen çatışmazlığına işarə edir. Bu dəyişikliyin KOAH astma və anadangəlmə ürək qüsurları kimi xəstəliklərlə bağlı olması mümkündür. Bu hal qəflətən yaranarsa, təcili tibbi yardım tələb edilir.

Dırnaqların çatlaması və parçalanması ətraf mühit təsirləri, əllərin tez-tez yuyulması, kimyəvi maddələr və qida çatışmazlıqları səbəbindən yarana bilər. Bu hal davamlı olduqda hipotiroidizm, anemiya və digər metabolik problemlər araşdırılmalıdır.

Mütəxəssislər bildirirlər ki, bir neçə dırnaq eyni vaxtda dəyişirsə və bu, digər simptomlarla müşayiət olunursa, vaxtında tibbi müayinə aparmaq vacibdir.