İyunun 6-da Heydər Əliyev Sarayında Bakıda ilk dəfə keçirilən Opera Günlərinin açılış mərasimi olub.

AZƏRTAC-a açıqlamasında Əməkdar artist Ramil Qasımov layihənin məqsədindən danışıb. O bildirib ki, Azərbaycanda opera ənənələrini davam etdirmək prioritet məsələlərdəndir.

Əməkdar artistin sözlərinə görə, layihə çərçivəsində müxtəlif ustad dərsləri, operalar və konsert proqramları təşkil olunacaq: “Üzeyir Hacıbəyli təkcə musiqi tariximizin deyil, milli kimliyimizin, mənəvi yaddaşımızın sütunlarından biridir. Onun yaratdığı zəngin irs, milli operamızın təməlini qoyan əzəmətli sənət dünyası bu gün də yaşayır, dillər əzbəridir və bizi birləşdirir. Bizim vəzifəmiz isə bu irsi qorumaqla kifayətlənməmək, onu gələcək nəsillərə sevdirərək yaşatmaqdır. Gənclər bu tədbirlər vasitəsilə həm böyük sənətkarın yaradıcılığı ilə yaxından tanış olacaq, həm də Azərbaycan musiqisinin nə qədər dərin köklərə və mənəvi zənginliyə malik olduğunu bir daha anlayacaqlar. Layihə yalnız bir mədəniyyət hadisəsi deyil, həm də bir dəyərin yaşadılması, milli irsimizin gələcəyə daşıdığı işıqdır”.

Sonra Üzeyir Hacıbəylinin “Leyli və Məcnun” operası təqdim olunub. Əsas obrazları Xalq artistləri Mənsum İbrahimov və Nəzakət Teymurova ifa ediblər.

Operanın dirijoru Əməkdar incəsənət xadimi Sevil Hacıyeva, quruluşçu rejissoru Əməkdar incəsənət xadimi Hafiz Quliyev, quruluşçu rəssamı Xalq rəssamı, Rafiz İsmayılov, icraçı rəssamı Əməkdar mədəniyyət işçisi Tehran Babayev, baletmeysteri isə Əməkdar incəsənət xadimi Yuliana Elikşinzadədir.

Tarda ifa Xalq artisti Elçin Həşimova, kamançada müşayiət Əməkdar artist Elnur Əhmədova aid olub.

Opera Günləri iyunun 25-dək davam edəcək.