ABŞ gürcü hərbçilərin Əfqanıstan və İraqdakı missiyalarda iştirakı sayəsində 2,5 milyard dollar qənaət edib.

"Report"un məlumatına görə, bunu Gürcüstanın Baş naziri İrakli Kobaxidze yerli "İmedi" telekanalına müsahibəsində deyib.

"Amerika tərəfi bizim Əfqanıstan və İraqdakı missiyalarda iştirakımız sayəsində 2,5 milyard dollar qənaət edib. Eyni zamanda ABŞ büdcəsindən ölkəmizə real yardım 2,5 milyard dollardan çox azdır", - Kobaxidze bildirib.

Gürcüstan hökumətinin başçısı vurğulayıb ki, o, ABŞ-nin Beynəlxalq İnkişaf Agentliyi (USAID) və Demokratiyaya Dəstək Milli Fondunun xətti ilə Gürcüstana yardım adı altında ayrılan pulları nəzərdə tutmur. Baş nazirin sözlərinə görə, bu təşkilatlar vasitəsilə ayrılan pullar ölkədəki iğtişaşlara xərclənib.

Bundan əlavə, hökumət başçısının sözlərinə görə, Gürcüstan hərbi tapşırıqları yerinə yetirərkən 32 hərbi qulluqçusunu itirib.

“Bizim ABŞ Prezidenti Donald Trampın administrasiyası qarşısında qoyduğumuz yeganə tələb ədalətdir”, - Kobaxidze fikirlərini yekunlaşdırıb.