Psixatrop maddə satan həmkəndlilər saxlanıldı.
Bizimyol.info xəbər verir ki, DİN-in mətbuat xidmətindən verilən məlumata görə, Astara Rayon Polis Şöbəsinin əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində rayonun Şahağacı kənd zakini Elzamin Feyruzzadə 1 bükümdə çəkisi 0,2 qram psixatrop maddə olan metamfetamini satarkən cinayət başında saxlanılıb.

Onun üzərinə keçirilən baxış zamanı əlavə olaraq satış məqsədi ilə saxladığı 11 büküm metamfetamin aşkarlanaraq götürülüb.

Davam edən əməliyyat tədbirləri nəticəsində E.Feyruzzadənin həmin psixatrop maddəni həmkəndlisi, əvvəllər məhkum olunmuş Həbib Muxtarovdan əldə etdiyi məlum olub. H.Muxtarov polis əməkdaşları tərəfindən Şahağacı kəndi ərazisində saxlanılıb və üzərinə keçirilən baxış zamanı satış məqsədilə üzərində gəzdirdiyi 13 bükümdə psixatrop maddə olan metamfetamin aşkarlanaraq götürülüb.

Faktla bağlı araşdırma aparılır.