Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudov Samux rayonunda şəhid leytenant Elvin Məmmədzadənin ailəsini ziyarət edib.

Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, ziyarət zamanı şəhidin vətənpərvərliyindən və 44 günlük Vətən müharibəsində göstərdiyi şücaətlərdən bəhs olunub.

Şəhidin ailəsinə sosial ödənişlər təyin edilib və ailə ilə bağlı digər sosial dəstək tədbirləri həyata keçirilib.

Agentlik sədri şəhid Elvin Məmmədzadənin xatirəsinin daim əziz tutulacağını, ailənin bundan sonra da dövlət qayğısı ilə əhatə olunacağını vurğulayıb.

Qeyd edək ki, Vətən müharibəsi şəhidi Elvin Məmmədzadə 2020-ci il noyabrın 9-da Şuşa uğrunda döyüşlərdə şəhid olub.

Prezident İlham Əliyevin sərəncamları ilə o, ölümündən sonra “Azərbaycan Bayrağı” Ordeni, həmçinin “Azərbaycan Ordusunun 100 illiyi (1918-2018)”, “Vətən uğrunda”, “Şücaətə görə”, “Qubadlının azad olunmasına görə”, “Füzulinin azad olunmasına görə” və “Şuşanın azad olunmasına görə” medalları ilə təltif edilib.