Ağır və çətin işlər, adətən, kişilərə həvalə olunur. Amma o qədər də asan olmayan belə işlərin öhdəsindən gəlməyi bacaran qadınlarımız da çoxdur. Belə xanımlardan biri də Aygün Məmmədovadır. Onu yaxından tanımaq, işinin öhdəsindən necə gəldiyini öyrənmək üçün gərək onu addım-addım izləyəsən, işinin xarakterik xüsusiyyətlərinə bələd olasan.
Qadın Tanrıdan sonra ikinci yaradıcı qüvvəyə malik şəxsdir. Qadın atasına qız, anasına həmdəm, qardaşına bacı, sevdiyi şəxsə məhəbbət, övladına anadır. Qadın zəhmətkeşdir, sevgi doludur, bütün ağrısını, acısını gözlərinin dərinliklərində dəfn edib həyata, sevdiyinə, valideyninə, övladına, cəmiyyətə gülümsəməyi bacarandır. Qadın yaşından, bədənindən, qüvvəsindən qat-qat ağır yükün öhdəsindən sevdiklərinin xətrinə dodaqlarındakı təbəssümü ilə gələn fədakardır. Qadın "kipriyi ilə od götürüb, saçlarını süpürgə etməyi" bacarandır. Məhz Aygün xanım da belələrindəndir.
Aygün xanım deyir ki, evdar qadınlar daha bacarıqlı və işgüzardırlar. Hər bir sahədə böyük uğurlara imza atan Azərbaycan qadını ailədə də ciddi uğurlar qazanar. O da işdən sonrakı boş vaxtlarını dəyərləndirərək ailə qayğıları ilə məşğul olur. Valideyn olmaq özü şərəfli və məsuliyyətli yükdür.
"Qadın zəif məxluqdur" bu ifadə həyatda çox eşidirik Qadına zəif demək ilk dəfə kimin ağlına gəlib görəsən? Axı bu dünya hələ daş dövründə mövcud olan anaxaqanlığının üzərində qurulub. Nə idi anaxaqanlığı? Bu proses hələ üst paleolit dövründə yaranmışdı. İcmanın bütün işlərində öncül olan qadınlar idarəetməni də öz üzərilərinə götürmüşdülər. Həmin zaman yemək bişirmək, odu qoruyub saxlamaq, uşaqlara baxmaq, məhsul-qida toplamaq qadının işi idi və qəbilə ana xətti ilə qohumluq əsasında yaranmışdı.
Sonradan isə cəmiyyətdə qadın bir addım geriyə çəkildi və patriartxat, yəni ataxaqanlığı yarandı. Bəs, qadın həmin işlərindən imtina etdimi? Təbii ki, yox. Qadının işləri daha da artmağa başladı, nəinki azalmaq. Heç təsadüfi deyil ki, İohann Kristof Fridrix Şiller deyirdi ki, dünyanı yaşayış üçün yararlı hala salan qadınlardır.

Bütün bunlara baxmayaraq qadın heç zaman zəif məxluq olmayıb. Amma qadın zərif məxluqdur. Bunu da kimsə inkar edə bilməz. Qadın zərafəti ilə, həssas, kövrək qəlbi ilə, analığı ilə zəriflik Tanrısıdır!
Hazırda ictimai həyatımızda daimi fəaliyyət göstərib uğur əldə edən qadınlarımız var. Cəmiyyətimizdə fəaliyyət göstərən, böyük nüfuz sahibi olan qadınlarımızdan biri də Aygün Abasqulu qızı Məmmədovadır.
Bu xanım xeyli vaxtdır ki, mətbuatdadır. Həyatı boyu hər zaman haqq tərəfdarı olub, övladlarını da bu ruhda böyüdüb. Onun fikrincə, yazarın yaradıcılığı, düşünmə bacarığı, araşdırma qabiliyyəti olmalıdır. Bu sənətdə təkrarçılığa yol vermək olmaz. “Bu elə bir peşədir ki, gərək özünü hər gün sübut edəsən. Yoxsa 100 diplomun olsun, yaza bilmirsənsə, boynuna götürdüyün işi sonadək başa çatdırmayırsansa, bir işə yaramayacaq. Yazarın hadisələrə yanaşma bacarığı yoxdursa, ona heç nə kömək etməyəcək”, - deyir Aygün xanım.
Zəhməti, əziyyəti, əsəbi, qələmi, gecə-gündüz çalışmağı hesabına çox şeyə nail olub. Xeyirxahlığı, təvazökarlığı, işgüzarlığı, gözəl ailəsi ilə başqalarına nümunədir. Sevincini dostları ilə bölüşüb, dərdini, kədərini, nisgilini, acısını-ağrısını içində yaşadıb. Həyat çox halda üzünə gülməsə də, o, gülməyi, dostlarının sevincinə sevinməyi bacarıb. İmkanları geniş olub, müxtəlif sahələrdə çalışan qohumları, dostları olsa da, heç vaxt, heç kəsə öz işi üçün ağız açmayıb. Ailənin ruzisini qələmindən çıxarıb.

Aygün Məmmədovanın bu gün ad günüdür. Masallıda anadan olub. 1985-ci ildə elə Masallıda da orta təhsilini başa vurub. 1989-cu ildə isə hüquqşünas ixtisasına yiyələnib. Təhsil almaqla yanaşı rayon icra hakimiyyətində çalışıb.
Az müddət sonra bu sahədə çalışmaq üçün təklif alır və Bakı şəhərinə köçüb və 23 ildir ki, Bakı şəhərində yaşayır, çalışır, yaradır. Ailəlidir, 2 oğlu var. Onlar cəmiyyətə yararlı ruhda böyüdülüb tərbiyə edilib.
Media sahəsində çalışdığı müddətdə tərcümeyi-halı müxtəlif qəzetlərlə zəngin olub. Belə ki, əvvəlcə “Qanunçuluğun keşiyində” şöbə müdiri, “Iskra” qəzetində redaktor müavini, “Zamanpress”də redaktor, “Tale yolları”nda redaktor müavini, “Bakineç” saytında və şəhidlərin, müharibə veteranlarının cəmiyyətində hüquqşünas kimi fəaliyyət göstərib. Hazırda “Əsrin qəzeti”ndə şöbə müdiri vəzifəsində çalışır.
Və fütrsətdən faydalanaraq “Turaz.tv.az” saytı vasitəsilə dostumuz Aygün xanımı yubiley yaşı münasibətilə təbrik edib ona cansağlığı və qadın xoşbəxtliyi arzulayırıq.