Xəbər verildiyi kimi, bu gün Nizaməddin Məhəmməd oğlu Quliyev Ağstafa Rayon İcra Hakimiyyətinin başçısı vəzifəsindən azad edilib. Bununla bağlı dövlət başçısı sərəncam imzalayıb.

Bizimyol.info xəbər verir ki, Ağstafa Rayon İcra Hakimiyyətinin rəsmi saytında Nizaməddin Quliyev hələ də icra başçısı vəzifəsində göstərilir. Keçid: Ağstafa Rayon İcra Hakimiyyəti

Qeyd edək ki, Nizaməddin Quliyev və başqaları vəzifə səlahiyyətlərindən sui-istifadə etmə, külli miqdarda təkrar rüşvət alma, mənimsəmə və digər faktlara görə Dövlət Təhlükəsizliyi Xidmətində Cinayət Məcəlləsinin müvafiq maddələri ilə başlanılmış cinayət işləri üzrə şübhəli şəxs qismində saxlanılıblar. Hazırda iş üzrə cinayətin digər iştirakçılarının müəyyənləşdirilərək istintaqa cəlb olunması istiqamətində zəruri istintaq-əməliyyat tədbirləri davam etdirilir.

Xatırladaq ki, bu ilin aprel ayında N. Quliyev Ağstafa Rayon İcra Hakimiyyətinin başçısı təyin edilib.