Azərbaycanın bu gününü müstəqilliyinin bərpasının ilk illəri ilə müqayisə etdikdə tamamilə fərqli bir mənzərənin şahidi oluruq. Yeni Azərbaycan Partiyasının (YAP) yaradılmasını zəruri edən də məhz həmin dövrün reallıqları idi. Azərbaycan xalqının ən ağır, taleyüklü dövründə böyük narahatlıq hissi keçirən ziyalılarımız Yeni Azərbaycan Partiyasının yaradılması ilə bağlı ulu öndər Heydər Əliyevə müraciət ünvanladılar. Beləliklə, 1992-ci ilin noyabrın 21-də Naxçıvan şəhərində YAP-ın təsis konfransı keçirildi, Partiyanın nizamnaməsi və proqramı qəbul edildi. Ulu öndər Heydər Əliyev açıq səsvermə yolu ilə Yeni Azərbaycan Partiyasının sədri seçildi.

AZƏRTAC-ın bölgə müxbiri xəbər verir ki, bunu Yeni Azərbaycan Partiyası Bərdə rayon təşkilatının sədri Fəqət Şadlinskaya deyib. Təşkilatın sədri bildirib ki, YAP yarandığı gündən xalqın partiyası kimi tanınıb. Ulu öndər Heydər Əliyevin adı ilə bağlı olan partiyaya xalqın inamı böyükdür. YAP proqramında hədəflərini açıqlayaraq onların həyata keçirilməsi istiqamətində davamlı addımlar atıb. Yeni Azərbaycan Partiyası yarandığı vaxtdan bir neçə ay keçdikdən sonra hakim partiyaya çevrildi. 1993-cü ildə ulu öndər Heydər Əliyevin xalqın təkidli tələbi ilə hakimiyyətə qayıdışından sonra ölkəmizin, Yeni Azərbaycan Partiyasının həyatında yeni dövr başladı. Azərbaycan davamlı uğurları ilə dünyanın diqqətində oldu.

Azərbaycanın bu gününü və gələcəyini düşünərək möhkəm təməl yaradan ulu öndər Heydər Əliyevin siyasətini bütün sahələrdə uğurla davam etdirən Prezident İlham Əliyevin hər bir çıxışı, ən yüksək tribunalardan səsləndirdiyi fikirlər dünyaya nümunə göstərilən inkişaf modelimizin təqdimatıdır. Bu baxımdan Yeni Azərbaycan Partiyasının ötən il tarixi Zəfərimizin reallıqları əsasında keçirilən VII qurultayı həm ölkəmizin, həm də partiyanın qarşısında dayanan vəzifələrin açıqlanmasında əhəmiyyətli rol oynadı. Prezident, YAP Sədri İlham Əliyev bir daha bu əminliyi böyük qürur hissi ilə ifadə etdi ki, Yeni Azərbaycan Partiyası bundan sonra da ölkəmizdə bütün proseslərin mərkəzində dayanacaq. Yeni Azərbaycan Partiyası şanlı və əzəmətli ənənələrə malik olan partiyadır.