Şəmkirdən Qəbələyə gələn şəhid anaları və şəhid ailələri ilə ilk olaraq Şəhidlər Xiyabanında görüşdük. Birlikdə şəhidlərimizin əziz xatirəsini yad etdik, onların ruhuna dualar oxuduq və müqəddəs məzarları ziyarət etdik. Şəhid analarının bir-birinə baxışında, söylədiyi hər sözdə həm böyük bir həsrət, həm də sonsuz qürur hiss olunurdu.Daha sonra Qəbələnin igid oğlu, şəhid Ağaşirin Babayevin məzarını ziyarət etdik. Ardınca şəhid Məhəmməd Qarayevin məzarını ziyarət edərək onun da əziz xatirəsini ehtiramla yad etdik. Şəhid məzarları qarşısında insan bir daha anlayır ki, bu torpağın hər qarışının arxasında böyük bir fədakarlıq, böyük bir həyat və böyük bir ailə həsrəti dayanır.
Görüşümüz Qəbələ Rayon İntellektual İnkişaf Mərkəzində davam etdi. Burada general-mayor Polad Həşimovun adına keçirilən, dəyərli yazar Rəna xanımın təşkil etdiyi tədbirdə Şəmkir şəhid ailələri ilə birlikdə iştirak etdik. Bu görüşdə şəhidlərimizin həyat yolu, Vətənə bağlılığı və onların bizə əmanət etdiyi dəyərlər haqqında fikirlər səsləndirildi.
Daha sonra Qəbələnin restoranlarından birində səmimi süfrə arxasında görüşümüz davam etdi. Tədbirin təşkilində Qəbələ Rayon İcra Hakimiyyətinin nümayəndələrinin, şəhid ailələri ilə çalışan əməkdaşların, eləcə də digər aidiyyəti şəxslərin iştirakı və dəstəyi xüsusi qeyd olunmalıdır. Şəmkir şəhid ailələrinin Qəbələdə qarşılanması və onlara göstərilən diqqət, qayğı və qonaqpərvərlik bu görüşün ən gözəl tərəflərindən biri oldu.
Bu görüşün təşkilində mənim dəvətimlə iştirak edən şəhid ailələrinə məqsədimiz şəhid ailələri arasında mənəvi bağların daha da möhkəmlənməsinə, onların bir-birinin sevincinə və kədərinə şərik olmasına töhfə vermək idi. Çünki şəhid ailələri arasında qurulan hər bir dostluq, hər bir görüş bizim üçün böyük mənəvi dəyər daşıyır.
Tədbirimizi Qəbələ TV-nin çəkiliş qrupu da işıqlandırdı. Media nümayəndələrinin iştirakı ilə bu gözəl günün xatirələri yaddaşlarda qalacaq şəkildə lentə alındı.
Bu gün həm də bizim üçün xüsusi bir gün idi. Qəbələ şəhidi Məmməd Qarayevin anası, dəyərli Könül müəllimənin doğum gününü də birlikdə qeyd etdik. Şəhid anasının doğum gününü belə bir mənəvi məclisdə, şəhid analarının əhatəsində qeyd etmək həm duyğulu, həm də çox anlamlı oldu. Könül müəlliməyə möhkəm can sağlığı, uzun ömür və övladının adı ilə qürur duyacağı neçə-neçə gözəl gün arzuladıq.
Şəmkirli şəhid analarının Qəbələdən xoş təəssüratlarla, yüksək əhval-ruhiyyə ilə ayrılması bizim üçün ən böyük sevinc oldu. Onlar Qəbələnin gözəlliyindən, insanlarının səmimiyyətindən, qonaqpərvərliyindən və burada gördükləri diqqət və qayğıdan böyük məmnunluqla danışdılar. Öz övladlarının qəhrəmanlıq yolundan qürurla söz açdılar və bir daha göstərdilər ki, şəhid analarının qəlbində övlad həsrəti ilə yanaşı, sonsuz bir qürur da yaşayır.
Bu gün biz bir daha gördük ki, şəhid ailələri üçün məsafələrin heç bir əhəmiyyəti yoxdur. Qəbələ ilə Şəmkir arasında yollar uzaq ola bilər, amma şəhidlik, Vətən sevgisi və ana qəlbi insanları bir-birinə çox yaxınlaşdırır.
Bu görüşdə iştirak edən, təşkilinə və keçirilməsinə dəstək olan hər kəsə təşəkkür edirəm. Qəbələyə gələn əziz Şəmkir şəhid ailələrinə isə deyirəm: Siz Qəbələyə qonaq kimi gəlmədiniz, doğma insanlar kimi gəldiniz. Bu torpaqda sizin övladlarınızın da adı, izi və əmanəti var.
Qoy şəhidlərimizin ruhu şad, məqamları uca olsun. Allah bütün şəhidlərimizə rəhmət eləsin, onların əziz ailələrinə səbir, can sağlığı və uzun ömür versin.
Şəhid ailələrinin birliyi bizim mənəvi gücümüz, şəhidlərimizin xatirəsi isə bizim müqəddəs əmanətimizdir.

Təranə Almemmedova
Dünya Azərbaycanlılarının Mədəniyyət Mərkəzi İB Qəbələ rayon nümayəndəliyinin rəhbəri