Xalq artisti Naibə Allahverdiyeva onun adından dələduzluq edildiyini açıqlayıb.

"Turaztv.az" "Unikal"-a istinadən xəbər verir ki, aktrisa naməlum şəxslərin süni intellekt vasitəsilə onun səsini təqlid edərək insanlardan kart məlumatlarını əldə etməyə çalışdıqlarını bildirib:

"Məni tanıyanlar, dostlarım və qonşularım, diqqətli olun. Bir-iki saat əvvəl aktrisa həmkarlarımdan biri mənə zəng vurdu və dedi ki, guya vatsap vasitəsilə ona yazmışam. Mesajda deyilirdi ki, hansısa mağazanın 22 illik yubileyi münasibətilə dost siyahısında olan insanlara 500-1000 manat hədiyyə edilir. Bunun üçün də mənim adımdan kart məlumatları istənilir. Hətta səsimdən də istifadə ediblər. Süni intellekt vasitəsilə səsimi hazırlayıb göndəriblər. Mənim isə bundan heç bir xəbərim yoxdur. Bəxtəvər başıma, 500 min".

N.Allahverdiyeva əlavə edib ki, özü də əvvəllər oxşar dələduzluq cəhdinin qurbanı olub:

"Bir dəfə də sosial şəbəkədə bir televiziya işçisi mənə nəyisə təsdiqləməyi yazmışdı. Mən də etdim. Nəticədə həm feysbuk, həm də instaqram hesabım bağlandı. Sonra gördüm ki, mənim adımdan insanlardan müxtəlif şeylər istəyirlər. Bilin, sizə mənim adımdan mesaj göndərilsə inanmayın".