“Bakı karlik” adlanan teatrın direktoru, aktyor Natiq Fərzəliyev balacaboy aktyorların üzləşdiyi çətinliklər və yeni teatrın yaranma ideyası barədə AZƏRTAC-a açıqlama verib.

Onun sözlərinə görə, bu teatrı yaratmaq fikri illər əvvəl, sənət yolunun başlanğıcında üzləşdiyi çətinliklərdən qaynaqlanıb. Natiq Fərzəliyev bildirib ki, teatrlara işə düzəlmək istədiyi dövrlərdə tez-tez “aktyor boylu-buxunlu olmalıdır” kimi stereotiplərlə qarşılaşıb, bir çox hallarda isə qapılar üzünə bağlanıb. O vurğulayıb ki, səhnədə əsas meyar aktyorun boyu deyil, obrazı canlandırmaq bacarığı və istedadıdır.

Natiq Fərzəliyev Hüseynağa Atakişiyevin ona göstərdiyi dəstəyi də xatırladıb: “Hüseynağa Atakişiyev mənə ilk dəstək verən insanlardan oldu. Məni öz teatrına dəvət etdi, qapılarını açdı. O günlər yaddaşımdan heç vaxt çıxmır. Tanınandan sonra tamaşalarda iştirakım afişalarda yer alırdı. Bəzən məndən soruşurdular: “Sən niyə öz teatrını yaratmırsan?” mən də düşünürdüm ki, gərək bir fərqlilik edib. Nəsə seçilən, fərqli bir iş görmək istəyirdim”.

Aktyorun sözlərinə görə, ideya son 1-2 ildə daha konkret formaya düşüb: təsadüfən bir çəkiliş meydançasında bugünkü heyətin əsas üzvlərini görüb, onlarla əlaqə saxlayaraq bir araya gətirib.

Hazırda kollektivdə 5-6 balacaboy aktyorun toplandığını deyən N.Fərzəliyev əlavə edib ki, teatra qoşulmaq istəyənlər də var. Bildirib ki, məqsəd bu sahədə istedadlı insanları bir araya gətirmək və onların səhnəyə çıxması üçün imkan yaratmaqdır.

“Teatrda ilk olaraq “Bir gecənin nağılı” adlı tamaşa nümayiş olunacaq. Tamaşa Xalq artisti Vidadi Həsənovun yaratdığı “M” teatrının binasında nümayiş etdiriləcək. Vidadi Həsənovun quruluşçu rejissoru olduğu tamaşada aktyorlardan Ülviyyə Qarayeva və Pərviz Teymurov rol alacaq”, - deyə o əlavə edib.

N.Fərzəliyev Vidadi Həsənovun dəstəyini xüsusi qeyd edərək, premyeranın 2026-cı ilin yanvar ayında nəzərdə tutulduğunu bildirib. Onun sözlərinə görə, teatr bir tamaşa ilə dayanmaq niyyətində deyil və repertuarın janr baxımından rəngarəng olması planlaşdırılır.

O əlavə edib ki, balaca boylu aktyorlardan ibarət teatr Azərbaycanda ilk layihədir: “Belə bir teatrın yaranması həm işsizliyin qarşısını almaq, həm də balacaboy aktyorları eyni səhnəyə toplamaq məqsədi daşıyır. Teatrda yeni əsərlərə quruluş veriləcək, həmin əsərlərdə özüm də rol alacam”.