Toy ənənəsi dünyanın hər yerində sevgi rəmzi sayılır.

"Turaztv.az" “Qafqazinfo”-ya istinadən xəbər verir ki, bəzi ölkələrdə bu mərasimlər fərqli adətlərlə keçirilir.

Məsələn, çinlilərin inancına görə, gəlin toy günündən bir ay öncə hər gün ağlamağa başlayır. Bu, onun ailəsi ilə vidalaşması və gələcək həyatına hazırlıq kimi qəbul olunur.

Toy günü yaxınlaşdıqca gəlinin anası və bacıları da ona qoşulur. Bu ritual ölkənin əksər bölgələrində həyata keçirilir.

Hindistanda ad günü “uğursuz tarixə” tuş gələn qadınlar əvvəlcə müqəddəs bir ağacla evlənməli, sonra onu kəsməlidirlər.

Bu mərasimdən sonra onlar “bəd taledən təmizlənmiş” sayılır və əsl toya icazə verilir.

Doğum tarixinin uğurlu və ya uğursuz olmasına isə “pandit” adlı dini astroloqlar qərar verir.

Danimarkada bəy və gəlinin dostları toydan sonra onların üzərinə kofe tozu, un, yumurta və sous tökürlər.

Bunun əsas məğzi isə cütlüyün birgə həyatın çətinliklərinə nə qədər dözümlü olacağını göstərməkdir. Bu adət “qızıl tozlama” adlanır.

Koreyada toy bitdikdən sonra bəyin dostları onu yerə uzadıb ayaqlarını taxta çubuqlarla döyürlər.

Bu ritual onu “evlilik həyatına hazırlamaq” məqsədi daşıyır.

Almaniyada “Polterabend” (red.-Subaylıq gecəsi) adlı qədim adət var. Toydan əvvəl dostlar və qohumlar toplanır, qab-qacaq sındırılır.

Daha sonra toyu olacaq cütlük bu sınıqları birlikdə təmizləyir.