Bərdə torpağı tarix boyu igidlər, ziyalılar və vətəninə sədaqətli insanlar yetişdirib. Bu insanların sırasında elələri var ki, onların adı təkcə yaşadıqları bölgədə deyil, bütün ölkə miqyasında ehtiramla çəkilir. Etibar Hüseynova məhz belə şəxsiyyətlərdən biridir.

O, uzun illərdir ki, Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin Bərdə rayon filialına rəhbərlik edir. Onun həyat missiyası yalnız vəzifə borcu ilə məhdudlaşmır – bu işi bütün varlığı ilə sevərək, qəlbinin dərinliyindən gələn məsuliyyət hissi ilə görür.

Etibar Hüseynovanın həyatı şəhidlik zirvəsinə ucalmış bir qəhrəmanla da bağlıdır. Onun həyat yoldaşı Sərhəd Zöhrabbəyov Azərbaycan Bayrağı ordenli, vətən uğrunda canını fəda etmiş şəhidimizdir. Bu itki onun qəlbində şəhid ailələrinə qarşı daha böyük həssaslıq, vətən uğrunda mübarizəyə daha dərin inam formalaşdırıb.
Etibar Hüseynova 1998-ci il Prezident seçkilərində Qarabağ bölgəsi üzrə Ulu Öndər Heydər Əliyevin səlahiyyətli nümayəndəsi olub. Bu şərəfli vəzifə ona yalnız siyasi etimad deyil, həm də böyük bir tarixi missiya qazandırıb.
O, həmçinin ölkənin müstəqilliyinin möhkəmlənməsi və dövlətçiliyin inkişafında göstərdiyi xidmətlərə görə bir sıra yüksək mükafatlarla təltif olunub:

Müstəqilliyimizin 20 illiyi medalı
"Tərəqqi" medalı
Ulu Öndərin 100 illik yubiley medalı


Bu mükafatlar onun ictimai-siyasi fəaliyyətinin ölkə və beynəlxalq səviyyədə tanındığını sübut edir.


Etibar Hüseynova üçün hər şəhidin xatirəsi müqəddəsdir. O, 27 Sentyabr – Şəhidlər Günündə, Anım Günü tədbirlərində və ilboyu keçirilən memorial mərasimlərdə ən ön sırada dayanır. Onun təşəbbüsü ilə Bərdədə çoxsaylı anım tədbirləri, açıq dərslər və gənclərlə görüşlər təşkil olunur. Bu tədbirlərdə məqsəd yalnız keçmişi yad etmək deyil, həm də gənc nəslə vətən sevgisi aşılamadır.
O, dəfələrlə çıxışlarında Ulu Öndər Heydər Əliyevin Azərbaycanı vətəndaş müharibəsindən xilas edərək sabitliyə qovuşdurmasını xüsusi vurğulayıb. Etibar Hüseynovanın fikirlərində hər zaman dövlətə, orduya və Prezident İlham Əliyevin siyasətinə dəstək açıq-aşkar hiss olunur.

Etibar Hüseynova vəzifəsini kabinetdən idarə edən biri deyil – hər zaman şəhid ailələrinin evində, veteranların yanında, ehtiyacı olan insanların qapısında görünür. Onun ən böyük mükafatı isə insanların səmimi “Allah razı olsun” sözləridir.

Etibar Hüseynova sadəcə bir ictimai təşkilat rəhbəri deyil – o, həm də şəhid həyat yoldaşının əmanətini, Vətən qarşısında borcunu ləyaqətlə daşıyan, Bərdə üçün mənəvi dayağ, ölkə üçün isə vətənə sədaqət nümunəsidir. Onun səmimiyyəti, əməlləri və xalqına sevgisi gələcək nəsillərə örnək olacaq dəyərlərdir.
Turaztv.az Dövletxeber.az-a istinadən