Dünyadan küsən şair - FOTO

Xəbərlər

24.10.2023, 20:25

Dünyadan küsən şair - FOTO

Dünyadan küsən şair

Şeir adi hissin deyil, ruhi təsəvvüfün nəticəsidir. Hesab edirik ki, savad gücünə yazılan şeir ilhamla yazılan şeir qədər poetik, mənamı, məzmunlu və düşündürücü olmur. Son illər ara-sıra rast gəldiyimiz şeirlərin bəzilərində ilham qaynarlığı görürük və o şeirləri oxuduqca ruhumuz rahatlıq tapır. Səmimi deyək ki, bu ilin sonlarında şeirləri ilə tanış olduğumuz Könül Şirvanlı da ilhamın ovqatı ilə fikirlərini şeirə çevirir, oxucuda məmnunluq hissi yaradır. Könül xanımın «Küsmüşəm, dünya» adlı kitabında da poetik yük əsas göstəricidir. Kitab 2005-ci ildə nəşr olunub, lakin bu gün əldə etmişik. Vaxtın önəmi yoxdur, əsas odur ki, Könül Şirvanlı ilhamının ilıq-isti sərhədlərində fikri elə tərzdə cilovlayır ki, heyrətini gizlədə bilmirsən.
Dediklərimizi sübut etmək üçün Könül xanımın şeirlərindən bir neçə nümunəyə diqqət çəkmək istəyirik:

Bu dünyanın zirvəsində,
Dərəsində, düzündəyəm.
Dəryasında batmamışam, -
Mən suların üzündəyəm,
Həyat mənim gözümdədir.
*
Acı bir həqiqət yatır içimdə,
Ölmək əvəzinə yaşayıram mən.
Doğrunu yalana satıb içimdə
Ən ağır cinayət daşıyıram mən.
*
Necə gizli gəldin mənim ömrümə,
Elə gizli-gizli yaşayacaqsan.
Ən həzin, duyğulu nəğmələr kimi
Qəlbimin gözünü oxşayacaqsan.

Bu nümunələri şərh etməkdən daha çox bir fikrə nəzər salmağımız kifayətdir; müəllif duyğularını müasir şeirin havası ilə isidir, oxucunu adi hissdən doğan mürəkkəb situasiyalarla üz-üzə qoyur. Şairin qəti qərar verməsi, hislərin qoynuna düşüb azmaması, hadisə və prosesləri fikir süzgəcindən sadə, boyasız, ütüsüz və ləkəsiz halda keçirə bilməsi onun həqiqi mənada ilhamlı olmasına dəlalət edir.
Aşağıdakı nümunələrdə də biz eyni ədəbi qayəni aşkar izləyə bilirik:

Qanım bulaq suyu, qəlbim çeşmədir,
Gözümdə həqiqət hər şeydən uca.
Böyüyə böyüyəm, kiçiyə kiçik,
Özüm cavanamsa, düşüncəm qoca.
*
Mən necə həyata inanım daha?
Məhəbbət sol əldi, nifrət sağ əldi.
Hər kəsə məhəbbət bəslədiyimdən
Nifrəti qəzəbi üstümə gəldi?

Bu poetik parçalarda da əsasən lirik təcəssümün doğurduğu ədəbi xarakterləri görür, onların məzmun və mənasında sanbal tapırıq. Və belə zənn edirik ki, ümumiyyətlə, Könül Şirvanlı üçün şeir ilhamın təsiridir, ruhi zəmində baş verən ədəbi prosesdir. Belə olmasaydı, onun qələm nümunələri oxucunu bu qədər tərpədə, düşündürə bizməzdi.
Maraqlıdır, Könül xanımın bütün şeirlərində xətt birdir, ancaq ünvanlar, obrazlar, hətta hislər başqadır. O, bu adilik içində qeyri-adilik tapmaq naminə ədəbi dərkini oxucunun qavraya biləcəyi tərzdə buxovlayır, könül nəğmələrini ruhumuza sığdıra bilir.
İnanırıq ki, Könül Şirvanlının son illərdə yazdığı şeirlər daha təsirli, daha mükəmməldir. Yəqin ki, bu şeirlərlə tanışlığımız onun haqqında növbəti bir yazının ərsəyə gəlməsi üçün imkan yaradacaq.
Könül xanıma yaradıcılıq uğurları arzulayır, ədəbi zövqünün daha parlaq olmasını diləyirik.