Regionların sosial-iqtisadi inkişafının təmin olunması Azərbaycan dövlətinin əsas məqsədlərindəndir. Prezident İlham Əliyevin rəhbərliyi və tapşırığı ilə müxtəlif sahələri özündə əks etdirən geniş və çoxşaxəli layihələr hazırlanaraq həyata keçirilir. Buna görə də dövlətimizin başçısı mütəmadi olaraq ölkənin müxtəlif rayonlarında olur. Azərbaycan Prezidenti səfər çərçivəsində iqtisadiyyatın müxtəlif sahələrinə uyğun müəssisələrin açılışını edir, onların fəaliyyətini yoxlayır, regionların sosial-iqtisadi vəziyyəti ilə yerində tanış olur və bu sahədə müvafiq tapşırıqlarını verir. Qazax, Şəmkir, Samux və Bərdə rayonlarına dövlətimizin başçısının son səfəri zamanı müasir yol xəttinin, xəstəxana, məktəb və digər xidmət və istehsal sahələrinin açılışının edilməsi regionların inkişafına olan diqqətin təzahürüdür.

Bu fikirləri AZƏRTAC-a açıqlmasında Ana Vətən Partiyası sədrinin müavini, politoloq Yalçın Hacızadə söyləyib.

Politoloq bildirib: “Prezident İlham Əliyev çıxışlarında ölkədə iqtisadi inkişafın təmin olunması onun fəaliyyətinin əsas istiqamətlərindən olduğunu qeyd edib. Ölkəmizdə davamlı inkişaf əsasında iqtisadiyyatın rəqabətqabiliyyətliliyini, inklüzivliyini və sosial rifahın artırılmasını təmin etmək məqsədilə 2016-ci ildə iqtisadiyyatın əsas sektorları üzrə strateji yol xəritəsinin təsdiq edilməsi haqqında Sərəncam imzalanıb. Sərəncamda orta və uzunmüddətli dövrləri əhatə etməklə iqtisadiyyatın 11 sahəsinin inkişaf planları göstərilib. Həmçinin 2021-ci il fevralın 2-də imzalanan Sərəncamla “Azərbaycan 2030: sosial-iqtisadi inkişafa dair Milli Prioritetlər” proqramı hazırlanıb. Həmin proqramla ölkənin inkişafına dair 5 əsas meyar– dayanıqlı artan rəqabətqabiliyyətli iqtisadiyyat, dinamik, inklüziv və sosial ədalətə əsaslanan cəmiyyət, rəqabətli insan kapitalı və müasir innovasiyalar məkanı, işğaldan azad olunmuş ərazilərə Böyük Qayıdış və təmiz ətraf mühit və “yaşıl artım” götürülməklə “Qüdrətli dövlət və yüksək rifah cəmiyyəti” qurulmasının yolu müəyyən edilib”.

Y. Hacızadə əlavə edib ki, 44 günlük Vətən müharibəsi nəticəsində işğaldan azad olunmuş Qarabağ və Şərqi Zəngəzur bölgəsinin ölkənin ümumi iqtisadiyyatına reinteqrasiyası məqsədilə yenidən qurulması, yeni beynəlxalq və regional nəqliyyat-logistika layihələrin həyata keçirilməsi, dövlətimiz üçün prioritet təşkil edir. Bununla yanaşı, Azərbaycan Prezidentinin Respublikanın digər bölgələrinə ardıcıl səfərlər etməsi, şəhər, rayon və kəndlərimizdə geniş quruculuq işlərinin davam etdirilməsi ölkənin dinamik inkişafını təmin edir. Eyni zamanda, dövlətimizin başçısının regionların inkişafı məsələlərini şəxsi nəzarətində saxlaması, bu istiqamətdə tapşırıqlar verməsi və qərarlar qəbul etməsi Azərbaycanın müasir simasının formalaşdırılmaısıdır. Regionların inkişafı ilə bağlı həyata keçirilən siyasət qüdrətli, sabit, təhlükəsiz Azərbaycan deməkdir. Bu da Prezident İlham Əliyev tərəfindən uğurla həyata keçirilir.