"İndiyədək sosial müavinətlərin maliyyə yükü 400 milyon manata yaxın idisə, növbəti ildən həmin məbləğ 800 milyon manata çatdırılacaq".
Bizimyol.info xəbər verir ki, bunu jurnalistlərə açıqlamasında Əmək və Əhalinin Sosial Müdafiəsi nazirinin müavini Anar Kərimov bildirib.

Nazir müavini: "Prezident İlham Əliyev tərəfindən əhalinin sosial rifahının yüksəldilməsi üçün sosial paketlərin nəzərdən keçirilməsi ilə bağlı verdiyi tapşırığa uyğun olaraq mütəmadi tədbirlər həyata keçirilir. Bu il sosial müavinətlərin məbləğində ciddi dəyişikliklər olub. Bu ilin əvvəlində 14 növ müavinət, 7 növ prezident təqaüdü artırılıb", -deyib.

Anar Kərimovun sözlərinə görə, "gələn il beynəlxalq təcrübədən çıxış edərək sosial xidmətlərin səyyar formada göstərilməsini təkmilləşdirilmək və yeni modelin tətbiqinə başlamaq istəyirik. Azərbaycanın əksər bölgələrində müxtəlif sosial layihələr həyata keçirilir. Bu layihələrə təxminən 1500 nəfər cəlb olunub. İl ərzində 10 mindən çox vətəndaşa sosial sifariş vasitəsilə xidmət göstərilir. Dekabrın 2-də ölkə başçısı sosial infrastrukturun təkmilləşdirilməsi üçün əlavə vəsait ayırıb. Bu bizə bir daha imkan verəcək ki, sosial layihələrin əhatə dairəsini daha da genişləndirək. Eyni zamanda sosial infrastrukturu da gücləndirək".