ONLARI HEÇ VAXT UNUDA BİLMƏRİK

Qarabağ müharibəsi şəhidlərinin ailəsi ölkə Prezidenti cənab İlham Əliyevə müraciət etdi

Nə qədər oğul itirdik Qarabağ hadisələri başlanandan üzü bəri... Nə qədər oğul və qızımızın ömrü yarımçıq qaldı... Nə qədər nakam ruh dolaşır indi Qarabağın səmasında... Onları heç zaman unuda bilmərik. Yüz illər keçsə də, xalqımız, başına gətirilən bu dəhşətli faciələri və ömrü yarımçıq qalmış o nakam qəhrəmanları unutmayacaq. 1988-ci ildən başlayan Vətən mücadiləmiz, qanlı döyüşlər, qanı bu torpaqda Vətənin azadlığı naminə axmış şəhidlərin ruhu bunu diktə edir...
Ermənilərin ruslarla birlikdə törətdikləri vəhşiliklər, bizə yaşatdıqları Xocalı faciəsi qanlı və həzin yara oldu Azərbaycan xalqının ürəyində. Yüzlərlə insanın faciəli şəkildə öldürülməsi, yüzlərlə insanın əsir düşərək min bir işgəncəyə məruz qalması, yüzlərlə insanın isə itkin düşməsi ilə nəticələnən qanlı Xocalı soyqırımını – dünyada misligörünməyən erməni terrorunu unutmaq olarmı?
O yara hələ də qan verir, köz bağlamayıb. Aşağıdakı videolentdə Xocalıda qəhrəmancasına döyüşərək yaralanmış və düşmən tərəfindın əsir götürülərək, döyülüb işgəncələr verilərək vəhşicəsinə, insanlığa yaramayan vəhşiliklə öldürülmüş şəhid Rafiq Orucov haqqında ailəsinin xatirələrini təqdim edirik.
Onu da qeyd eləyək ki, şəhid Rafiq Orucovun atası da Xocalının Meşəli kəndi uğrunda gedən döyüşlərdə qəhrəmancasına həlak olmuşdur. Şəhidin bir qardaşı isə İkinci Qarabağ müharibəsi qazisidir.
İndi isə Vətənin azadlığı uğrunda 2 şəhid və bir qazi vermiş ailə özü çətin durumdadır. Ailə darısqal və şəraitsiz yataqxanada məskunlaşmışdır.
Şəhidin həyat yoldaşı və eyni zamanda şəhid anası, onkoloji xəstə olan Ziba ana – Azərbaycan Respublikasının Prezidenti, cənab Ali Baş Komandan, “dəmir yumruğ”un sahibi İlham Əliyevə və aidiyyəti orqanlara müraciət edərək mənzil problemlərinin həllini və onların yaşayış şəraitlərinin yaxşılaşdırılmasını xahiş edir. Bu ümiddədir ki, cənab Prezident onun bu narahatlığına son qoyulması, şəhid ailəsinin yaşadığı sıxıntılardan çıxması üçün müvafiq qurumlara tapşırığını verəcək.