Bildiyimiz kimi fevralın 5-də və 6-da baş vermiş zəlzələ İsmayıllı rayonunda da bir sıra fəsadlar törətmişdi - fərdi evlər qəzalı vəziyyətə düşmüş, sosial və infrastruktur obyektlərinə ziyan dəymişdi. Təbii fəlakətin törətdiyi fəsadların ən qısa zaman ərzində aradan qaldırılması ilə bağlı dövlət başçısınin aidiyyatı qurumlara sərəncam və tapşırıqları dərhal gəldi. Hadisənin səhəri günü sərəncamın icrası ilə əlaqədar görülən işlərlə yerində tanış olmaq üçün Azərbaycan Respublikasının Prezidenti cənab İlham Əliyev zəlzələ zonasına gələrək sakinlərlə görüşmüş, təbii fəlakətin törətdiyi fəsadların aradan qaldırılacağını bildirmişdi. Dövlətimizin başçısı baş vermiş zəlzələlər nəticəsində evlərə, sosial və infrastruktur obyektlərinə dəymiş ziyanın aradan qaldırılması üçün 2019-cu ilin dövlət büdcəsində nəzərdə tutulmuş Prezidentin ehtiyat fondundan kifayət qədər vəsaitin ayrılması haqqında Sərəncam imzalamışdı.

Bütün bunlara baxmayaraq hələ də qəzalı vəziyyətdə olan evlər var. Belə, qəzalı vəziyyətdə olan evlərdən biri də İsmayıllı rayonunun Basqal qəsəbəsində, Abbasova Əsmər Səfdər qızına məxsusdur.
Köməksiz, tənha yaşayan Əsmər xanım "Kainat.tv"-yə müraciət edib. Diqqətsizlikdən gileylənən Əsmər xanım ürəkyanğısı ilə qeyd etdi ki, mənim yaşadığım ev qəzalı vəziyyətdə olduğu halda, evə baxış keçirən Fövqəladə Hallar Nazirliyinin komissiya üzvləri və yerli nümayəndələr “EV QƏNAƏTBƏXŞDİR” – deməklə kifayətləndilər. Geri qayıdan zaman söylədilər ki, “PADVALA GİRMƏ HAA, EV UÇAR, QALARSAN ALTINDA”.

Əgər ev qənaətbəxşdirsə, bəs niyə uçsun ki?

Bax bu sual bizi hələ də düşündürür.

Əsmər Abbasova yeganə çıxış yolunu ölkə başçısı cənab İlham Əliyevə və birinci vitse prezident Mehriban xanım Əliyevaya müraciət etməkdə gördü.

Qarşı tərəfin mövqeyini dərc etməyə hazırıq.

Kainat.tv