Türk Hava Yolları (THY) 2023-cü ildə İstanbulda keçiriləcək UEFA Çempionlar Liqasının final oyununa sponsorluq edəcək.

Turaztv.az AZƏRTAC-a istinadən xəbər verir ki, Türk Hava Yollarının UEFA Çempionlar Liqasının final oyununa sponsorluğu ilə bağlı rəsmi mərasim THY İdarə Heyətinin və İcraiyyə Komitəsinin sədri professor Ahmet Bolat, şirkətin yüksəkvəzifəli rəsmiləri, Avropa Futbol Assosiasiyaları Birliyinin prezidenti Aleksandr Çeferin iştirakı ilə baş tutub.

Hər il 129 ölkədən milyonlarla insanı mənzil başına çatdıran Türk Hava Yolları gələn il iyunun 10-da UEFA Çempionlar Liqasının final oyununa rəsmi sponsorluq edəcək. Final oyunu Atatürk Olimpiya Stadionunda keçiriləcək.

THY-nin rəsmi sponsoru olduğu UEFA Çempionlar Liqası 70-dən çox yayım şirkəti vasitəsilə 200 ölkədə 678 milyon izləyiciyə çatdırılır.

Müqavilə çərçivəsində Türkiyənin milli bayraq daşıyıcısı UEFA Superkuboku, UEFA Futzal Çempionlar Liqası finalları və UEFA Gənclər Liqasının final oyunları ilə rəsmi sponsor kimi əməkdaşlıq edəcək.

Sponsorluqla bağlı THY İdarə Heyətinin və İcraiyyə Komitəsinin sədri professor Ahmet Bolat "Ölkəmizin bayraqdar hava yolu şirkəti olaraq, ən böyük idman tədbirlərindən biri olan UEFA Çempionlar Liqasına sponsorluq etməkdən xoşbəxtik" -, deyə bildirib.

Türk Hava Yolları EURO 2016-nın rəsmi hava yolu sponsoru kimi UEFA ilə əməkdaşlıq edən dünyada ilk hava yolu şirkəti olub.

Bayraqdar aviaşirkət, həmçinin “Barselona”, “Mançester Yunayted”, “Borussia Dortmund”, “Olympique de Marseille” və “River” kimi məşhur komandalara sponsorluq edib. Türk Hava Yollarının sponsorluğu ilə çəkilən "The Selfie Shootout" roliki bütün zamanların ən çox baxılan reklamlarından biridir. Bu rolikdə dünyanın məşhur basketbolçusu Kobe Brayant və əfsanəvi futbolçu Lionel Messi çəkiliblər.