Bu komandaya qarşı oynamaq xoşdur. Amma 9 gün ərzində eyni rəqiblə 3 dəfə qarşılaşmaq futbolçulara mənfi təsir edir.

Turaztv.az AZƏRTAC-a istinadən xəbər verir ki, bunu “Qarabağ”ın baş məşqçisi Qurban Qurbanov səfərdə “Qəbələ”yə 2:0 hesabı ilə qalib gəldikləri Premyer Liqanın XXIV tur matçından sonra mətbuat konfransında deyib.

Əlli yaşlı mütəxəssis vacib qalibiyyət əldə etdiklərini bildirib: “Futbolçularım çox əziyyət çəkdi. Neçə gündür yaxınlarından, doğmalarından uzaqdadırlar. Bu mənada, bir az psixoloji yorğunluq var idi. Oyun kənardan sönük görünə bilər. Amma ümumi göstəricilərə baxsaq, oyunçularımın xeyli güc sərf etdiklərini görmək olar. “Qəbələ” də uduzmaq istəmirdi. Rəqibə uğurlar arzulayıram”.

Komandasını “qırmızı-qaralar”la Azərbaycan Kubokunun yarımfinal mərhələsinin cavab matçına yaxşı hazırlayacağını söyləyən Q.Qurbanov hələlik çempionluq barədə düşünmədiyini vurğulayıb: “Amma reallığa baxsaq, ola bilər. “Neftçi” də məğlub olmaq istəmir. Sonadək mübarizə aparmaq əzmindədir. Bundan sonrakı məğlubiyyətlər çempionluğumuza maneə ola bilər. Bunu düşünmədən qarşıdakı matçlara ciddi hazırlaşacağıq ki, rəqibə şans verməyək. Bilirsiniz ki, mən hər zaman ehtiyatlanıram. Bir şeyi qazanmamışamsa, əminliklə danışa bilmərəm. Çünki məndən asılı olmayan səbəblər var”.

“Qəbələ”nin məşqçisi Xaqani Məmmədov isə oyunun komandası üçün çətin keçdiyini etiraf edib: “Matça ciddi hazırlaşmışdıq. Amma heyətdə itkilərimiz var idi ki, bu da oyunumuza mənfi təsir göstərdi. “Qarabağ”ın gücünə bələdik. Bu gün belə kasad heyətlə meydanda nələrsə etməyə çalışdıq. Gücümüz buna çatdı”.

46 yaşlı mütəxəssis uğursuzluğun səbəbini də açıqlayıb: “Komandada elə bir dəyişiklik yoxdur. Sadəcə, əsas heyət üzvləri zədəli olduqları üçün bizə kömək edə bilmirlər. Meydana gənc oyunçularla çıxırıq. Uğursuzluğun əsas səbəbi budur. 3-4 gündən bir oynamaq üçün geniş heyətiniz olmalıdır. Bu gün kim hazırdırsa, meydana da onlar çıxır”.