“Müasir İnkişaf” İctimai Birliyinin təşkilatçılığı, Dini Qurumlarla İş üzrə Dövlət Komitəsinin tabeliyində Mənəvi Dəyərlərin Təbliği Fondunun maliyyə dəstəyi ilə icra olunan “Mənəvi dəyərlərimizi yaşadaq və təbliğ edək” layihəsinin növbəti tədbiri onlayn formatda keçirilib. Tədbir Azərbaycan Vətəndaş Hərəkatının (AVH) təşkilati dəstəyi ilə baş tutub və Zəfər gününə, Bayraq gününə həsr olunub.
AVH-nin icraçı direktoru, “Müasir İnkişaf” İctimai Birliyinin sədri Mübariz Göyüşlü layihənin məqsədindən, görülən işlərdən və perspektiv planlardan bəhs edib. O, 44 günlük qələbənin qazanılmasında dəyərlərimizin, xüsusilə də mənəvi dəyərlərimizin çox böyük təsirinin olduğunu qeyd etdi.
ADNSU-nun kafedra müdiri, tarix elmləri doktoru, professor, “Şuşa. Pənahabad” kitabının müəllifi Camal Mustafayev 44 günlük müharibənin dönüş nöqtəsi olan Şuşa haqqında tarixi bilgilərini bölüşüb. Professor Azərbaycanın mədəniyyət paytaxtı olan Şuşa şəhərinin tarixi, yerləşdiyi coğrafi mövqe, onun əhəmiyyəti və s. haqqında tədbir iştirakçılarına ətraflı məlumatlar verdi.
Azərbaycan İlahiyyat İnstitutunun müəllimi, ilahiyyat üzrə fəlsəfə doktoru Vüqar Səmədov şəhidlik fəlsəfəsi haqqında çıxış etdi. O, Qarabağı işğaldan azad edərkən şəhid olan hərbiçilərimizin, vətəndaşlarımızın ən ali məqamda olduqlarını qeyd etdi.
AMEA Tarix İnstitutunun aparıcı elmi işçisi, dosent Elmar Məhərrəmov mənəvi dəyərlərimiz, tarix şüuru, milli kimliyimiz və s. mövzular ətrafında fikirlərini çatdırdı.
Antalya-Azərbaycan Kültür və Dayanışma Dərnəyinin sədri Ceyran Səttarova Türkiyədə, Antalyada gördükləri işlərlə, xüsusən də II Qarabağ müharibəsi ilə bağlı fikirlərini bölüşdü.
AVH-nin Məclis üzvü, dosent, t.ü.f.d. Mübariz Ağalarlı I Qarabağ müharibəsi haqqında danışıb. O, eyni zamanda II Qarabağ müharibəsi zamanı azad edilmiş yerlərdə azan verilməsini mənəvi dəyərlərə bağlılığın göstəricisi kimi qiymətləndirdi.
ADPU-nun tələbəsi Anar Salehoğlu Ümummilli lider Heydər Əliyevin və prezident İlham Əliyevin dövründə görülmüş işlərdən, müzəffər Ali Baş Komandanın rəhbərliyi ilə II Qarabağ müharibəsində əldə edilən zəfərdən söz açdı.
AVH-nin İdarə Heyətinin üzvü, əməkdar müəllim Aydın Allahverdiyev Azərbaycan xalqının, türk millətinin xüsusiyyətlərindən, mərdliyindən, qəhrəmanlığından və s. bəhs edib.
AVH-nin İdarə Heyətinin üzvü, tarixçi alim, dosent Hacı Həsənov Şuşa qələbəsinin mənəvi dəyərlərimizi daha da zənginləşdirdiyini qeyd etdi. O, Şuşa qalibiyyətinin Gövhər Ağa məscidindən azan çəkilməsi vasitəsilə bəyan edilməsini, mənəvi dəyərlərimizi qorumağın vacibliyini və s. tədbir iştirakılarının diqqətinə çatdırdı.
Turaztv.az