“TANAP-dan Naxçıvan Muxtar Respublikasına qaz verilə bilər. Bu, texniki cəhətdən mümkündür”.

Bu barədə Trans-Anadolu Qaz Boru Kəməri (TANAP) layihəsinin Baş direktoru Saltuk Düzyol məlumat verib.

O bildirib ki, buna gərək olub-olmaması ayrıca müzakirə mövzusudur. Hazırda isə Naxçıvana qaz verilişi ilə bağlı layihə Türkiyənin BOTAŞ şirkəti tərəfindən ediləcək sərmayə ilə həyata keçiriləcək:

“Beləliklə, İğdır vilayətindən 500 milyon kub metr qaz verilə biləcək. Bu, BOTAŞ-ın beynəlxalq nəqletmə şəbəkəsinə daxil olan qazdan veriləcək. TANAP-dan Naxçıvana birbaşa bağlantı isə hələ ki, nəzərdə tutulmur. Növbəti illərdə tələb olarsa, bu, həyata keçirilə bilər. Hazırda buna ehtiyac yoxdur. Çünki, hazırda Naxçıvana ən yaxın mənbə İğdır hesab edilir”.

Qeyd edək ki, BOTAŞ şirkəti Trans Anadolu Boru Kəməri (TANAP) layihəsində 30 faiz paya sahibdir.