Xəbərlər
20.08.2026, 22:14
GÜVƏNDİYİM A DAĞLAR, SƏNƏ DƏ QAR YAĞARMIŞ - FOTO
Şeir kimi yazılıb, misraya düzüldükcə,
Sular kimi lillənib, durulub, süzüldükcə,
Həyatımdan keçəni düşünüb üzüldükcə,
Qara, siyah saçıma dənlər düşüb, ağarmış,
Güvəndiyim a dağlar, sənə də qar yağarmış.
Usanmışam, bezmişəm, vallah yorğunam yaman,
Nəfəsimi kəsənlər niyə verməyir aman?
Özümə sual verib, düşünmüşəm çox zaman,
Görən niyə bu qədər daşım belə ağırmış?
Güvəndiyim a dağlar, sənə də qar yağarmış.
Yaşadıqca görmüşəm hər şeyin çox-azını,
Dilləndirdim qəlblərin sarısimli sazını.
Çəkmişəm insanların ədasını,nazını,
Özüm bir od parçası, amma bəxtim fağırmış,
Güvəndiyim a dağlar, sənə də qar yağarmış.
Haqsızlığa dözmürəm,olmuram haqsızla tən,
Bəlkə yoxdur bu yolda, mənim yanımdan ötən.
Özümü məcbur edib, susmaq istəsəm də mən,
İçimdəki haqq səsim hey hayqırıb, bağırmış,
Güvəndiyim a dağlar, sənə də qar yağarmış.
Mələklər şahid olur, mənim ahu-zarıma,
Göydən başıma yağan, yağışıma, qarıma.
Qoşuluram yuxuda qartalıma, sarıma,
Uçuram mən göylərdə, sanki göylər çağırmış,
Güvəndiyim a dağlar, sənə də qar yağarmış.
19.08.2026
Son xəbərlər
Ən çox oxunanlar
- Bu gün
- Bu həftə
- Bu ay
