Son ictimai rəy sorğularında Prezident İlham Əliyevə etimadın 87,7 faiz, dövlət başçısının fəaliyyətinin müsbət qiymətləndirilməsinin isə 93,6 faiz təşkil etməsi, respondentlərin 81,9 faizinin onu alternativsiz siyasi lider hesab etməsi Azərbaycanda formalaşmış güclü dövlət-xalq birliyinin və həyata keçirilən uğurlu siyasətin nəticəsi kimi dəyərləndirilə bilər.

Bu fikirləri AZƏRTAC-a açıqlamasında QHT-lərə Dövlət Dəstəyi Agentliyinin Müşahidə Şurasının üzvü, “Xankəndi” Məcburi Köçkünlərə Dəstək” İctimai Birliyinin sədri Xatirə Vəliyeva deyib.

Onun sözlərinə görə, bu yüksək etimadın əsas səbəblərindən biri Prezident İlham Əliyevin milli maraqlara söykənən, uzaqgörən və prinsipial siyasət yürütməsidir. Dövlət başçısı bütün fəaliyyəti dövründə Azərbaycanın milli maraqlarını qətiyyətlə müdafiə edib, ölkəmizin müstəqilliyini və suverenliyini daha da möhkəmləndirib.

“Prezident, Müzəffər Ali Baş Komandan İlham Əliyevə ictimai etimadı daha da gücləndirən ən mühüm tarixi amillərdən biri 44 günlük Vətən müharibəsində qazanılan şanlı Zəfər və 2023-cü ildə Azərbaycanın tam suverenliyinin bərpasıdır. Bu tarixi nailiyyətlər nəticəsində dövlətimizin ərazi bütövlüyü tam təmin olundu, Qarabağ və Şərqi Zəngəzurda genişmiqyaslı bərpa və yenidənqurma işlərinə başlanıldı, "Böyük Qayıdış" Proqramının icrası uğurla davam etdirilir. Qələbədən sonra Azərbaycanın beynəlxalq nüfuzu daha da yüksəldi. Prezident İlham Əliyevin rəhbərliyi ilə ölkəmiz təkcə regionun deyil, qlobal siyasətin də mühüm dialoq və əməkdaşlıq mərkəzlərindən birinə çevrildi. Son illər Bakıda və işğaldan azad edilmiş ərazilərdə keçirilən mötəbər beynəlxalq tədbirlər bunun bariz nümunəsidir”, - deyə Müşahidə Şurasının üzvü qeyd edib.

X.Vəliyeva bildirib ki, Bakı dünyanın ən mühüm iqlim tədbirlərindən biri olan COP29-a uğurla ev sahibliyi edib. VI Ümumdünya Mədəniyyətlərarası Dialoq Forumu, XI Qlobal Bakı Forumu, BMT-nin Ümumdünya Şəhərsalma Forumu (WUF13), Şimal və Cənub arasında əməkdaşlıq platformalarına həsr olunmuş yüksək səviyyəli beynəlxalq konfranslar, eləcə də artıq ənənə halını almış Şuşa Qlobal Media Forumu Azərbaycanın beynəlxalq nüfuzunun və ölkəmizə göstərilən etimadın göstəriciləridir. Şuşa Qlobal Media Forumunun qısa müddətdə nüfuzlu beynəlxalq platformaya çevrilməsi, dünyanın onlarla ölkəsindən media rəhbərlərinin, ekspertlərin və siyasətçilərin Qarabağın dirçəlişinin şahidi olması Prezident İlham Əliyevin formalaşdırdığı yeni siyasi reallıqların beynəlxalq səviyyədə qəbul edildiyini göstərir.

“Prezident İlham Əliyevə yüksək ictimai etimad yalnız daxili siyasətdə əldə olunan uğurlarla deyil, həm də Azərbaycanın beynəlxalq nüfuzunun güclənməsi, qlobal təşəbbüslərin müəllifinə çevrilməsi, tarixi Zəfərin yaratdığı yeni geosiyasi reallıqlar və ölkənin təhlükəsiz, sabit inkişaf modelinin formalaşdırılması ilə şərtlənir. Azərbaycan Prezidenti İlham Əliyev xalqın etimadına söykənərək gücünü xalqdan alan, yeni reallıq yaradan, sözü imzası qədər dəyərli olan dövlət rəhbəri kimi dünya siyasətində öz layiqli yerini möhkəmləndirib”, - deyə ictimai birlik sədri əalvə edib.