Xəbərlər
ƏZİZƏ AĞAHÜSEYNQIZI : İnciyib, çıxıb gedirəm - FOTO
Dünya açıq pəncərədir,
Boylanıb, baxıb gedirəm.
Çatammadım arzulara,
illəri yıxıb gedirəm.
Qönçədədi arzu, dilək,
Dərmək olmur ləçək-ləçək,
Hər birisi canlı çiçək,
Sinəmə sıxıb gedirəm.
Yarıtmadı həyat, neynim,
Açılmayir ruhum, eynim,
Qürubadı daha meylim
Durulub, axıb gedirəm.
Baxma dolub, qaralmışam,
Bu ömürdən bac almışam,
Buludlardan taç almışam,
Şimşəktək çaxıb gedirəm.
Aramızda pərdə qoyub,
Nəyim vardı burda qoyub,
O ki, məni dərdə qoyub,
İnciyib, çıxıb gedirəm.
12.07.2026
