Xəbərlər
7.07.2026, 10:54
Mələklər ahımı bilən günüdü - FOTO
Dəyərli qələm adamı, sözün sərrafı,
qiymətli dost Qəzənfər Məsimoğlunun bacısı Kifayətin
vaxtsız ölümünə Qəzənfərin dilindən...
Xəbərin çox ağır səsləndi, bacım,
Doğmalar göz yaşın silən günüdü.
Buludlar üzümə leysan ələdi,
Bu gün Kifayətin ölən günüdü.
Yayın ortasında üşüdü qəlbim,
Dözmədim, tez durub yanına gəldim,
Sızlayan canımı qəbrinə sərdim,
Həsrətin könlümü dələn günüdü.
O sənli vədələr daha yetişmir,
Ürəyim qırıqdı, çatdı, bitişmir,
Zaman da addamır, vaxt da ötüşmür,
Cismimi ikiyə bölən günüdü.
Verilən ömürdü ağlı, qaralı,
Yaşadıq kədərli, yaslı, yaralı,
Ölüm ayrı saldı, qaldıq aralı,
Hicranın qapıma gələn günüdü.
Getdin, sevincimi aparıb getdin,
Məni məhvərimdən qoparıb getdin,
Xəlvətcə atlandın, çaparaq getdin,
Mələklər ahımı bilən günüdü,
Bu gün Kifayətin ölən günüdü.
07.07.2019
07.07.2026
Son xəbərlər
Ən çox oxunanlar
- Bu gün
- Bu həftə
- Bu ay
