Turaztv.az xəbər verir : Səda Musiqi Kursunun təsisçisi Ayten Rehimovanın rəhbərliyi ilə ərsəyə gələn proqramda fortepiano, skripka, kamança, tar, yan fleyta, nağara və vokal ifaları, eləcə də Azərbaycan xalq rəqsləri tamaşaçılara təqdim olunub. Türkiyə və Azərbaycanın ortaq mədəni irsinin yaşadılması və gələcək nəsillərə ötürülməsi məqsədi daşıyan konsert iştirakçılara unudulmaz anlar bəxş edərək əsl sənət bayramına çevrilib.


Konsert proqramı çərçivəsində Səda Musiqi Qrupunun ifasında Şur muğamı üzərində hazırlanmış “Qal sene Qurban”, “Ana Yurd” mahnıları səsləndirilib. Gecənin sonunda isə qrup tərəfindən “Çırpınırdın Qara dəniz” və “Yaşa Azərbaycan” əsərləri təqdim olunaraq proqram təntənəli şəkildə yekunlaşdırılıb.
Səda Musiqi Kursunun şagirdləri fortepianoda Azərbaycan və dünya klassik musiqisinin görkəmli bəstəkarlarının əsərlərini böyük ustalıqla ifa ediblər. Konsertdə Tofiq Quliyev, Volfqanq Amadey Motsart, Frederik Şopen və İohann Sebastyan Baxın əsərləri səsləndirilərək tamaşaçılar tərəfindən alqışlarla qarşılanıb.
Proqramın ən yaddaqalan nömrələrindən biri də Azərbaycanın görkəmli şairi Mikayıl Müşfiqin poeziyasına həsr olunmuş kompozisiya olub. Şairin “Oxu tar” şeirindən səhnə keçidi edilərək Şur muğamı üzərində “Qalsana Qurban” musiqi kompozisiyası təqdim edilib.

Azərbaycan kamançasının müşayiəti ilə dahi bəstəkar Vasif Adıgözəlovun “Füzuli Kantatası”ndan parçalar və “Nazəndə Sevgilim” əsəri səsləndirilib. Rəqs qrupunun təqdimatında isə “Naz eləmə” və “Sarı Gəlin” rəqsləri nümayiş etdirilib. Rəqqaslar öz çıxışları ilə Azərbaycan mədəniyyətini, milli-mənəvi dəyərləri və Türk Dünyasının zəngin mədəni irsini tamaşaçılara təqdim etməyə çalışıblar.
Gecənin final hissəsində Azərbaycan nağarasının ritmləri altında rəqs qrupunun təqdim etdiyi dinamik kompozisiya böyük maraqla qarşılanıb və proqram coşqulu notlarla başa çatıb.
Tədbirin sonunda şagirdlərə, müəllimlərə, musiqiçilərə və rəqqaslara təşəkkürnamələr və plaketlər təqdim olunub. İştirakçılar uğurlu təşkilatçılığa görə Səda Musiqi Kursunun rəhbərliyini, müəllimlərini və şagirdlərini təbrik edərək onlara gələcək fəaliyyətlərində yeni uğurlar arzulayıblar.