Heydər Əliyev adı Azərbaycan tarixində sadəcə siyasi lider anlayışı ilə məhdudlaşmır. O, milli dövlətçilik təfəkkürünü yenidən formalaşdıran, xalqın gələcəyini müəyyən edən və Azərbaycanın müasir inkişaf strategiyasının əsaslarını yaradan fenomenal şəxsiyyətdir. XX əsrin ikinci yarısından etibarən xalqımızın ictimai-siyasi, iqtisadi və mədəni həyatında baş verən bütün fundamental dəyişikliklərin mərkəzində məhz Heydər Əliyev iradəsi dayanmışdır.
1969-cu ildə respublika rəhbərliyinə gələn Ulu Öndər qısa müddət ərzində Azərbaycanı keçmiş ittifaqın geridə qalmış bölgəsindən inkişaf edən sənaye, elm və mədəniyyət mərkəzinə çevirməyə nail oldu. Onun uzaqgörən siyasəti nəticəsində milli kadr potensialı formalaşdırıldı, minlərlə azərbaycanlı gəncin nüfuzlu ali məktəblərdə təhsil almasına şərait yaradıldı, milli özünüdərk və milli-mənəvi dəyərlərə bağlılıq daha da gücləndirildi. Azərbaycanın gələcək müstəqilliyinin ideoloji və institusional təməlləri məhz həmin dövrdə atıldı.

1990-cı illərin əvvəllərində dövlətçiliyimizin ağır təhlükələrlə üz-üzə qaldığı mürəkkəb tarixi mərhələdə xalq yenidən öz xilaskarına üz tutdu. 1993-cü ildə hakimiyyətə qayıdan Heydər Əliyev parçalanmaq təhlükəsi yaşayan Azərbaycanı vətəndaş qarşıdurmasından, siyasi xaosdan və dövlət müstəqilliyinin itirilməsi riskindən xilas etdi. Onun rəhbərliyi ilə ölkədə sabitlik və hüquqi dövlət quruculuğu təmin olundu, milli ordu formalaşdırıldı, demokratik idarəçilik prinsiplərinin əsası qoyuldu.
1995-ci ildə qəbul olunan Azərbaycan Respublikasının Konstitusiyası dövlətimizin hüquqi-siyasi inkişaf istiqamətini müəyyənləşdirən mühüm tarixi sənəd kimi milli dövlətçilik tariximizə daxil oldu. “Əsrin müqaviləsi” isə Azərbaycanın iqtisadi müstəqilliyini təmin edən, ölkəmizin beynəlxalq enerji siyasətində strateji aktora çevrilməsinin əsasını qoyan mühüm dönüş nöqtəsinə çevrildi.
Ümummilli Liderin siyasi kursunun ən böyük zəfəri isə bu gün qalib və qüdrətli Azərbaycan reallığında öz təsdiqini tapır. Prezident İlham Əliyevin rəhbərliyi ilə həyata keçirilən uğurlu dövlət siyasəti nəticəsində Azərbaycan regionun lider dövlətinə çevrilmiş, 2020-ci ildə 44 günlük Vətən müharibəsində qazanılmış möhtəşəm Qələbə ilə ölkəmizin ərazi bütövlüyü və tarixi ədalət bərpa olunmuşdur. Bu Zəfər həm də Heydər Əliyev ideyalarının təntənəsi, onun uzaqgörən dövlətçilik məktəbinin tarixi qələbəsidir.
Bu gün Fəxri Xiyabanda Ulu Öndərin əziz xatirəsini ehtiramla yad edərkən bir daha anlayırıq ki, Heydər Əliyev irsi Azərbaycanın milli sərvəti, dövlətçilik məktəbi və gələcək inkişaf yolunun dəyişməz ideoloji istiqamətidir. Xalqına sonsuz sevgi ilə xidmət edən bu böyük şəxsiyyətin adı Azərbaycan tarixində daim yaşayacaq, onun idealları gələcək nəsillərə yol göstərəcəkdir.
Mən də Azərbaycan dövlətçiliyinə sədaqəti həyat amalına çevirən milyonlarla vətəndaşdan biri kimi, bu müqəddəs gündə Ulu Öndərin ruhu qarşısında ehtiramla dayanır, onun əziz xatirəsini dərin hörmətlə anıram.
Ruhunuz şad olsun, Ulu Öndər!
Allah sizə rəhmət eləsin!
Nəhayət Şirinova
ADPU Quba filialı
Heydər Əliyev Lektoriyasının müdiri.