İran tərəfi ABŞ ilə yeni danışıqlar aparmaq istəyinə dair yayılan məlumatları qəti şəkildə təkzib edib.

“Qafqazinfo” İranın “Tasnim” agentliyinə istinadən xəbər verir ki, İslamabadda keçirilən ilk raunddan dərhal sonra davamlı olaraq görüş xahiş edən tərəf məhz rəsmi Vaşinqtondur.

Agentliyin məlumatına görə, amerikalılar Pakistan vasitəçiliyi ilə danışıqların davam etdirilməsi üçün müraciətlər edirlər.

Xəbərdə qeyd olunur ki, ABŞ mediası Vaşinqton nümayəndələrinin artıq Pakistana yollandığını iddia etsə də, hələlik heç bir görüş qərarı yoxdur. Rəsmi Tehran bildirib ki, ABŞ tərəfinin “hədsiz tələbləri” ucbatından hazırkı şəraitdə hər hansı görüşün keçirilməsi məqsədəuyğun sayılmayıb.

Xatırladaq ki, bir qədər əvvəl Ağ Evin mətbuat katibi Kerolayn Levitt xüsusi nümayəndə Stiv Uitkoff və Cared Kuşnerin aprelin 25-i İslamabada gedəcəyini açıqlamışdı. Levit İranın “şəxsən danışıqlar aparmaq istədiyini” iddia etsə də, Tehranın son reaksiyası tərəflər arasında ciddi diplomatik ziddiyyətin davam etdiyini göstərir.

Qeyd edək ki, Ağ Ev bundan əvvəlki açıqlamalarında ABŞ və İran dialoqunda müəyyən irəliləyişin olduğunu bəyan etmişdi.