Çeçenistan Respublikasının rəhbəri Ramzan Kadırov respublikanın dövlət başçısı vəzifəsinə namizədliyini irəli sürməyə hazır olduğunu, ancaq Rusiya Prezidenti Vladimir Putinin dəstəyini alacağı təqdirdə bunu edəcəyini deyib.

"Turaztv.az" "Unikal" -a istinadən xəbər verir ki, o bu barədə "Telegram" kanalında yazıb.

Siyasətçi bildirib ki, Çeçenistanın Baş naziri Maqomed Daudov görüş zamanı Çeçenistanın ilk Prezidenti Əhməd-Hacı Kadırovun komandası və bütün çeçen xalqı adından ona Çeçenistan Respublikasının dövlət başçısı vəzifəsinə Vahid Rusiya Partiyasının namizədlərini müəyyən etmək üçün ilkin səsvermədə iştirak etməyi xahiş edib.

"Xalqın, bütün komandamızın bu yüksək etimadını yüksək qiymətləndirirəm və Rusiya Prezidenti Vladimir Vladimiroviç Putinin qərarı da çox vacibdir. Maqomed Xocahmedoviçə və müttəfiqlərimə təşəkkür etdim. Vurğuladım ki, yalnız namizədliyim ümummilli liderimiz tərəfindən dəstəklənərsə, namizədliyimi irəli sürməyə razı olacağam", - Kadırov yazıb.

Çeçenistan rəhbəri 2026-cı ilin payızında seçiləcək. Ramzan Kadırov qarşıdan gələn seçki kampaniyasında iştirak etmək arzusunu hələ 2023-cü ilin iyul ayında ifadə etmişdi.