GƏL SƏNİNLƏ NƏRD OYNAYAQ, A DÜNYA

Xəbərlər

11.12.2025, 18:15

GƏL SƏNİNLƏ NƏRD OYNAYAQ, A DÜNYA - FOTO

ƏZİZƏ AĞAHÜSEYNQIZI

Bu daşlarım, bu nərdtaxta,bu da zər,
Gəl səninlə nərd oynayaq,a dünya.
Ayaq saxla,dincini al,nəfəs dər,
Gəl səninlə nərd oynayaq,a dünya.

Elə bilmə qabağından qaçacam,
Elə bilmə yalvarıb əl açacam,
Əminəm ki, bu oyunda udacam,
Gəl səninlə nərd oynayaq,a dünya.

Mən Arazam sədlərimi qəm aşmaz,
Kövrəlsəm də gözlərimi nəm aşmaz,
Gəl zər atma, ta gözlərim qamaşmaz,
Gəl səninlə nərd oynayaq,a dünya.

Nə qazandın, nə itirdin bilirsən?
Qımışırsan,bığ altından gülürsən.
Uduzarsan,göz yaşını silərsən,
Gəl səninlə nərd oynayaq, a dünya.

Sən əslimi, sən kökümü apardın,
Qəflə-qatar duz yükümü apardın,
Sən babamı, sən nənəmi apardın,
Gəl səninlə nərd oynayaq,a dünya.

Qorqudumu, Ər Tonqamı neylədin?
Göytürkümü, Aşinamı teylədin,
Kainatı ələyində ələdin,
Gəl səninlə nərd oynayaq,a dünya.

Görən səni bir tas udan olubmu?
Gözlərində bir yaş udan olubmu?
Cox demirəm, bir daş udan olubmu?
Gəl səninlə nərd oynayaq,a dunya.

Dirəşmişəm, qorxum yoxdur ölümdən,
Bir söz dedim yaman tutdun dilimdən,
Şeir yazdım, budur gələn əlimdən,
Gəl səninlə nərd oynayaq,a dünya.

Gəlimlisən, gedimlisən bilirəm,
Bir son ucu ölümlüsən, bilirəm,
Acılısan, şirinlisən, bilirəm,
Gəl səninlə nərd oynayaq,a dünya.

Vərəq üstə qəlpələnən duyğuyam,
Röyalarda çiçək-çiçək uyğuyam,
Qacaq Kərəm, dəli Domrul oğluyam,
Gəl səninlə nərd oynayaq,a dünya.

Tufanından qorxum yoxdur ki,əsəm,
Şimşəyinə, yağışına mən bəsəm,
Qılınc cəkib, zəfər çalan Tomrisəm,
Gəl səninlə nərd oynayaq,a dünya.

Bax, sinəmdə nəğmə dolu ürək var,
Hey çağlayan, coşub-daşan dilək var,
Şeirimdə bir sehirli lələk var,
Yaşadacaq min illərlə sinəndə,
Gəl səninlə nərd oynayaq,a dünya.
Gəl səninlə nərd oynayaq,a dünya.