Biz mütəmadi olaraq oğurlanmış, girov saxlanılmış, zorakılıq və təcavüzə məruz qalmış miqrantlardan ifadələr alırıq. Liviyada olan miqrantlar Şimali Afrika regionunda ciddi çətinliklərlə üzləşirlər.

Turaztv.az AZƏRTAC-a istinadən xəbər verir ki, bunu Beynəlxalq Miqrasiya Təşkilatının baş direktoru Emi Poup bildirib.

O, əlavə edib ki, Liviyadan Avropaya keçən marşrut digər yollar arasında miqrantlar üçün ən çətinidir.

Liviya hakimiyyət orqanlarının qiymətləndirmələrinə görə, ölkəyə qanunsuz şəkildə daxil olmuş insanların sayı təxminən dörd milyon nəfərdir. Qaçaqmalçılar və insan alverçiləri 2011-ci ildə Müəmmər Qəddafi rejiminin devrilməsindən sonra ölkədə yaranan qeyri-sabitlikdən faydalanaraq öz fəaliyyətlərini və gizli şəbəkələrini genişləndiriblər.

Miqrantlar Avropaya dəniz vasitəsilə çatmaq məqsədilə Asiyadan, su və quru yollarla Liviyaya gəlirlər. Miqrantları daşıyan qayıqların batması hadisələrin bir hissəsi də Liviya sahilləri yaxınlığında baş verir. Eyni zamanda, Somali, Eritreya və 2023-cü ilin aprel ayının ortalarından bəri müharibə gedən Sudandan gələnlərin sayı da artıb. BMT-nin Qaçqınlar üzrə Ali Komissarlığının avqustda açıqladığı məlumatlara əsasən, həmin tarixdən bəri 357 mindən çox sudanlı qaçqın Liviyaya gəlib.

Avropaya keçid yollarından biri sayılan Tunisdə, xüsusən də Safaqis bölgəsində vəziyyət gərgindir. Poupun sözlərinə görə, orada miqrantların sayı yardım göstərilə bilənlərin sayından xeyli çoxdur və minlərlə insan müvəqqəti düşərgələrdə cəmlənib.

Poup Cənub ölkələri arasında əməkdaşlığa, inkişafyönümlü yanaşmalara, eləcə də qanuni və təhlükəsiz miqrasiyaya əsaslanan daha əhatəli həllərin vacibliyini vurğulayıb.