BƏHRUZ MƏMMƏDOV : Təzə müəllimi gördüyüm andan

Xəbərlər

4.10.2025, 18:48

BƏHRUZ MƏMMƏDOV : Təzə müəllimi gördüyüm andan - FOTO

Müəllimlərinizi sevin, amma belə yox)))
Heyif ki, dərdimi bilmirdi müəllim))

Məktəbə çox gözəl müəllim gəlib,
Belə bir səs-soraq yayıldı kəndə.
Bu xəbər mənim də qəlbimi dəlib,
Körpə ürəyimi salmışdı bəndə.

Cavab axtarırdım tək bir suala
Görəsən bizə də dərs deyəcəkmi?
Hərdən də düşürdüm xoş bir xəyala,
Məktədə getməyə vaxt gələcəkmi?

Canlanma var idi məktəb yolunda,
O gün başlamışdı təzə dərs ili.
Sinif rəhbərinin durub solunda,
Qabaqkı sıraya keçdim mən dəli.

Toplantı başlandı bilik günüycün,
İlk sözü direktor söylədi aman.
Təzə müəllimi tanışlıq üçün,
Çağırdı yanına söz deyən zaman.

Elə o zaman da uğultu qopdu,
Böyük uşaqların pıçıltısından.
Elə bil qəlblərə məhəbbət hopdu,
O gözəl simanın işıltısından.

Sinif rəhbərimə tutub üzümü,
Sualı söylədim səbirsiz kimi.
O da eşitməyib mənim sözümü,
İntizar içində qoydu qəlbimi.

Sən demə, çıxmırmış mənim heç səsim,
Təzə müəllimi gördüyüm andan.
Bu gözəl dünyada varmış bir kəsim,
Sevdim müəllimi həmin zamandan.

Əvvəl anlamadım düşündüyümü,
Dəli xəyalların toruna düşdüm.
Yadımdan çıxardım üşüdüyümü,
İsti bir duyğunun yoluna düşdüm.

Ən böyük arzuma catmışdım o gün,
Bizə də dərs dedi təzə müəllim.
Oxudum dərsimi onuncün hər gün,
Lövhə qarşısına deyim "mən gəlim".

Artmışdı həvəsim on qat məktəbə,
Səliqə-sahmana fikir verirdim.
Qəlbim də gəlmişdi yamanca təbə,
İngilis dilində qəzəl deyirdim.

Heç yata bilmirdim gecələr hərdən,
Bizə keçməyəndə müəllim dərsin.
Xəyalən toplayıb çiçəkdən, güldən
Ona vermək idi ancaq həvəsim.

Günlərin bir günü təzə bir xəbər,
Bomba tək partladı qulaqlarımda.
Gəlin köçəcəkdir o gözəl dilbər,
Taqət də qalmadı ayaqlarımda.

Son görüş, o son dərs, o son baxışlar,
Ah necə od tutub yanırdı qəlbim.
İçimə yağırdı qəmdən yağışlar,
Heyif ki, dərdimi bilmirdi müəllim.