2025-2026-cı illərdə universitetə daxil olan abituriyentlər arasında ən yaşlı tələbə 55 yaşındadır.

"Turaztv.az" “Qafqazinfo”-ya istinadən xəbər verir ki, həmin tələbə-1970-ci il təvəllüdlü Vəfa Cəfərova təəssüratlarını Modern.az-la bölüşüb.

V.Cəfərova deyib ki, ali təhsil almaq onun arzusu olub.

O, subbakalavr kimi Sumqayıt Dövlət Universitetinə qəbul olunub.

V.Cəfərova bildirib ki, bu, ilk təhsili deyil, daha əvvəl 1987-ci ildə Bakı İnşaat Texnikumuna qəbul olunub:

“2019-cu ildə isə Azərbaycan Neft və Sənaye Universitetinə (ADNSU) qəbul olunsam da, həmin il Elm və Təhsil Nazirliyi tərəfindən qəbul olduğum ixtisas təsdiq olunmadı, ADNSU-dan 2024-cü ildə subbakalavr olmaq üçün Neft Kollecinə göndərilmişəm. Keçən il Azərbaycanda olmadığım üçün sənədlərimi verə, bu səbəbdən universitetə daxil ola bilmədim. Bu il sənədlərimi verdikdə düşündüm ki, nəhayət, bu il universitet tələbəsi olmalıyam, başqa yolum yoxdur”.

Onun sözlərinə görə, universitetə bu yaşda daxil olmağının əsas səbəbi oxumağı sevməyidir:

“Hazırda “Azəriqaz” İstehsalat Birliyində mühəndis kimi işləyirəm. Həm oxumaq, həm də işləməyin çətin olduğunu bilirəm, amma çalışacam ki, bunu da bacarım”.