Azərbaycanın ən iri moda tədbiri olan “Azerbaijan Fashion Week” (“Azərbaycan Moda Həftəsi”) 18-ci mövsümünün keçirildiyini elan edib. Mayın 20-dən 25-dək davam edəcək bu möhtəşəm tədbir Bakıda baş tutacaq.

Turaztv.az AZƏRTAC-a istinadən xəbər verir ki, regionun bu nəhəng moda tədbiri istedadlı dizaynerləri, stilistləri, alıcıları və media peşəkarlarını bir araya gətirəcək. Moda dünyasında yaradıcılığın təşviqi və təcrübə mübadiləsi üçün unikal platforma təklif edən tədbir Azərbaycan Respublikası Mədəniyyət Nazirliyi yanında Mədəni və Yaradıcı Sənayelərin İnkişafı Mərkəzinin dəstəyi ilə təşkil olunur. Mərkəz ölkədə kreativ sənayelərin inkişafına, xüsusilə gənc istedadlar və moda sahəsindəki startaplara dəstək verir.

18-ci mövsüm təbii hadisələrə həsr olunub, mövzusu isə “The Spirit of Stone” adlanır. Bu mövzu davamlılığı, möhkəmliyi və əbədiliyi simvolizə edir, təbiət və yaradıcılıq arasında dərin əlaqəni əks etdirir.

Moda nümayişləri üçün seçilmiş məkanlar olan Qobustan Dövlət Tarixi-Bədii Qoruğu (23 may) və Qayaüstü abidələr muzeyi (Muzey daşı salnaməsi) (24 və 25 may) bu əhəmiyyətli hadisəyə xüsusi atmosfer qatacaq.

Tədbir çərçivəsində moda sahəsində son tendensiyaları və innovasiyaları təqdim edən yerli və xarici dizaynerlərin əl işlərini, həmçinin nümayiş etdirmək planlaşdırılıb. İştirakçılar aparıcı dizaynerlərin eksklüziv kolleksiyaları ilə tanış olmaq və işgüzar əlaqələr qurmaq imkanı əldə edəcəklər. Bundan başqa 20, 21, 22 və 24 may tarixlərində təhsil proqramı (mühazirələr, ustad dərsləri və yaradıcılıq görüşləri) təşkil olunacaq.

Tədbir moda sənayesində peşəkar bacarıqların inkişafına və beynəlxalq əlaqələrin gücləndirilməsinə töhfə verəcək.