Ötən gün 2025-ci ildə Bakıda keçiriləcək minifutbol üzrə dünya çempionatının püşkü atılıb.

"Turaztv.az" “Qafqazinfo”-ya istinadən xəbər verir ki, tədbirdə Azərbaycan Minifutbol Federasiyasının prezidenti Orxan Məmmədov da iştirak edib. Qonaqları salamlayan qurum rəhbəri son illərdə minifutbolun inkişaf etdiyini bildirib:

“AMF-nın prezidenti və ev sahibi kimi sizləri salamlayıram və uğurlar arzulayıram. Azərbaycan bu cür tədbirə ev sahibliyi etməkdən qürur duyur. Biz bir çox tədbirlər keçiririk, minifutbolu inkişaf etdiririk. Bu tədbir sırf müsabiqə deyil. Biz dostluq yaradırıq, oyunla bağlı öz hisslərimizi gücləndiririk. Minfiutbol son illərdə çox inkişaf edib. Bu gün biz onun gücünü, insanları ilhamlandırdığını, gənc nəsli istiqamətləndirdiyini görürük.

Biz Avropa çempionatında qalib olmuşduq. Azərbaycan Prezidenti və MOK-un prezidenti İlham Əliyev şəxsən Avropa çempionları ilə görüşmüşdü. Bu da idmançılarımız üçün böyük motivasiya vermişdi və ölkəmizdə idmanın inkişafına köməyini göstərmişdi. Azərbaycan bir çox tədbirləri uğurla keçirib. Avropa oyunları, İslam Həmrəylik Oyunları, 2019-cu ildə Avropa Liqasının final görüşü, AVRO-2020 oyunları, Formula 1 qran prisi və s.

Əminik ki, “Baku-2025” unudulmaz xatirələrlə yadda qalacaq. Mən Dünya Minifutbol Federasiyasına və xüsusən dostum Filip Yudaya təşəkkür edirəm. İstərdim ki, bütün federasiyalara bizə etimad göstərdiklərinə görə minnətdarlığımı bildirim. Gənclər və idman naziri Fərid Qayıbovu salamlayıram, ona minnətdaram. Müntəzəm olaraq, ölkədə idmanın inkişafına öz dəstəyini göstərib, bu cür təbdirlərin qəbul olunmasında vacib rol oynayıb. AFFA rəhbərliyinə də təşəkkür edirəm. Federasiyamızın ilk təsis olunduğu gündən yanımızda olublar. Sponsorlara və komandalara da təşəkkür edirəm. Onlar bugünkü tədbirin, turnirin uğurla keçirilməsində öz səylərini göstərib”.